Hazırda Yerevanda baş verənlərdə hərbi çevrilişin bütün əlamətləri var, amma əslində bu belə olmaya bilər.
Bunu rus tarixçisi, siyasi analitik, professor Oleq Kuznetsov Ermənistandakı daxili siyasi vəziyyətin gərginləşməsini Eurasia Diary-yə şərh edərkən deyib.
Xatırladaq ki, bundan əvvəl Ermənistan Silahlı Qüvvələrinin Baş Qərargahı Baş nazir Nikol Paşinyanın istefasını tələb edən bəyanat verib.
Politoloqun fikrincə, erməni xalqının etnopsixologiyasında dövlətçiliyə aid psixoloji motivlər çox güclüdür:
“Mən ermənilərin tarixində hərbiçilərin mülki idarəetməyə qarşı üsyan etdiyi hal ilə rastlaşmamışam. Eyni zamanda, ordunun öz xalqına qarşı hökumətin tərəfində durduğuna dair bir çox nümunələr var.
2018-ci ildə Ermənistanın keçmiş prezidenti Serj Sarkisyanın seçki nəticələrini saxtalaşdırmaq cəhdinə qarşı xalq etirazlarına qalxmış İrəvan əhalisinə qarşı Qarabağdakı hərbi hissələrdən istifadə etməyə çalışması kimi yeni bir nümunə var. Ancaq o zaman hərbçilər xalqa atəş açmadılar və Paşinyanın tərəfinə keçdilər.
Paşinyanın indi mülki əhali arasında, Ermənistan ictimaiyyətində yüksək səviyyədə dəstəkləndiyinə görə, indiki vəziyyətdə də, demək olar ki, ordunun silahdan istifadəyə riski etməyəcəyinə əminəm. Bundan əlavə, generallar siyasi oyun istəməsəydilər və həqiqətən hakimiyyətə gəlmək istəsəydilər, düşünürəm ki, Ermənistan Silahlı Qüvvələrinin Baş Qərargah rəisi ətrafına sadəcə 30-50 qəti mövqeli zabit toplaya bilərdi. Onlar Ermənistan Baş nazirinin kortejinin küçədə hardasa qarşısını kəsib, mühafizəçiləri tərksilah edib və ya atəş açıb ya da girov götürüb Paşinyanın özünə tələblərini diktə edə və ölkədə hakimiyyətin mülki idarəetmədən hərbi idarəetməyə keçməsini bir növ qanuniləşdirə bilərdi. Ancaq Ermənistan Silahlı Qüvvələri Baş Qərargah rəisinin açıqlamasından bir neçə saat keçib. İndi bildiyim qədəri ilə Ermənistanın hərbi rəhbərliyi tərəfindən heç kim qətiyyətli addım atılmayıb. Paşinyan azadlıqda qalmağa davam edir. Tərəfdarları insanları konstitusiya quruluşunu qorumaq üçün küçələrə çıxmağa çağırırlar və bu, başa düşdüyüm qədər onlarda alınır. Buna görə də, Ermənistanda hərbi çevriliş cəhdinin reallaşacağına əmin deyiləm. Çox güman ki, bu, yaxın gələcəkdə istefa etməsi gözlənilən bir sıra generalların siyasi nümayişi olacaq və bəlkə də dövlət sistemini zorla devirməyə çağırmaq ittihamı ilə həbslər olacaq".
Hüseyn Səfərov