İyun ayının 14-də Türkiyə Prezidenti Ərdoğanla Amerika Prezidenti Bayden arasında keçiriləcək görüş yaxınlaşdıqca müzakirəyə çıxarılacaq məsələlər də dəqiqləşdirilir. Əldə edilən son məlumatlara əsasən iki lider arasında müzakirələr 9 məsələ ətrafında cərəyan edəcək. Bunlar FETÖ ilə mübarizə, PKK/YPG-yə ABŞ tərəfindən verilən yardımın kəsilməsi, F-35 və S-400 problemi, Suriya, Liviya, Şərqi Aralıq Dənizi, Dağlıq Qarabağ məsələsi və ən nəhayət iki ölkə arasında ticarət dövriyyəsini 100 milyard dollara çatdırılmasıdır.

Bu məsələlərin müzakirə mövzusuna çevrilməsinə ikitərəfli danışıqlar nəticəsində nail olunub və son bir neçə ay ərzində iki ölkə arasındakı müvafiq qurumlar arsında aparılan intensiv danışıqlar bu məsələlər ətrafında ümumən hər iki tərəfi qane edən razılığın əldə olunduğunu deməyə əsas verir.

Müzakirə olunacaq məsələlərin demək olar ki, hamısı Türkiyə qədər Azərbaycanın da maraq dairəsindədir və Türkiyənin bu danışıqlarda əldə edəcəyi uğurlar eyni zamanda Azərbaycanın da uğurlarıdır. Məhz buna görə və xüsusilə Dağlıq Qarabağ məsələsinin müzakirə mövzusu olduğu üçün biz də bu görüşü və görüşdən əldə olunacaq nəticələri səbirsizliklə gözləyirik.

Türkiyə və Amerika Birləşmiş Ştatları arasında ticarət dövriyyəsini indiki 30 milyard dollardan 100 milyard dollara çatdırılması iki ölkə iqtisadiyyatının inkişafında mühüm rol oynayacaq. Bu, eyni zamanda, Azərbaycanın da ixrac potensialının inkişaf etdirilməsinə kömək edə bilər. Çünki, Türkiyənin müəyyən müddət ərzində Azərbaycanda istehsal olunan mallara da ehtiyacı yarana bilər. Yaxud, Türkiyə Amerikanın ticarət tələbini təmin etmək üçün Azərbaycandan istifadə edə bilər.

Türkiyə Prezidentinin görüşün ardınca Azərbaycana səfər etməyi qərar alması Dağlıq Qarabağ məsələsində Azərbaycan və Türkiyəni təmin edəcək müsbət qərarların alınacağından xəbər verir. Bu qərarları sürpriz olaraq Azərbaycan Respublikası Prezidenti İlham Əliyevə öz dili ilə çatdırmaq istəməsi Ərdoğanın Azərbaycan xalqı və onun Prezidentinə nə qədər yüksək qiymət verdiyinin növbəti dəfə sübutudur.

Heç şübhəsiz, Qarabağ məsələsinin bu səviyyədə danışıqların mövzusu olması və diqqətin növbəti dəfə müsbət prizmadan Azərbaycana yönəlməsi Tükiyə və Azərbaycan diplomatiyasının qələbəsidir. Orada bizim haqqımızda qəbul olunacaq istənilən müsbət qərar isə siyasi sahədə erməni simasındakı düşmənlərimizə vurulan növbəti zərbədir.

Biz hörmətli cənab Prezidentimizin ifadə etdiyi kimi “hücum diplomatiyamızı” bundan sonra daha da fəallaşdırmalıyıq.

Politoloq Əlimusa İbrahimov