Qarabağ erməniləri və Ermənistan arasında olan nifaq yeni hal deyil - Politoloq | Eurasia Diary - ednews.net

29 İyul, Cümə axşamı


Qarabağ erməniləri və Ermənistan arasında olan nifaq yeni hal deyil - Politoloq

Analitika A- A A+

Ermənistanın işğal etdiyi Qarabağı itirməsi ilə ölkədə yaranmış ikitirəlilik parlament seçkilərindən sonra özünü açıq şəkildə göstərməyə başlayıb.

Namizədlər arasında “Qarabağ klanı”nın təmsilçiləri olan Robert Koçaryan və Serj Sarkisyan seçkinin nəticələrini tanımadıqlarını və konstitusiya məhkəməsinə müraciət edəcəklərini bəyan ediblər. Bundan sonra isə Xankəndidə Araik Arutunyanın istefası tələbi ilə etirazlar keçirilib. Ermənilər bəyan ediblər ki, Arutunyan “artsaxlıların” mövqeyini əks etdirmir. Belə ki, Ermənistanda seçki günü Arutunyan Paşinyanın rəhbərlik etdiyi “Vətəndaş həmrəyliyi” blokunun baş qərargahına gəlib və sonradan Paşinyanı seçkilərdə qalib gəlməsi münasibətilə təbrik edib.

Məlumdur ki, Qarabağ erməniləri daha çox Koçaryanı dəstəkləyirlər və Qarabağın itirilməsində Paşinyanı, eləcə də Arutunyanı günahlandırırlar. İndiki halda seçkinin nəticələri Ermənistan və Qarabağ erməniləri arasında bağların qopmasına gətirib çıxara bilər.

Məsələ ilə bağlı politoloq Əhməd Əlili Eurasia Diary-yə açıqlama verib.

“Ermənistanda və Dağlıq Qarabağın özündə yaşayan ermənilər gələcəkləri ilə bağlı təhlükəsizliyin təmin olunmasını Robert Koçaryanın hakimiyyətə gəlməsində görürdülər. Belə bir fikir vardı ki, vaxtilə Koçaryanın rəhbərliyi altında olarkən vəziyyət tamamilə dəyişib. Ona görə də, Qarabağ erməniləri öz gələcəkləri ilə bağlı xoş perspektivləri bütünlüklə Koçaryanın adı ilə bağlayırdılar. Paşinyanın seçkilərdə önə çıxması bütün ermənilər üçün və Ermənistanı tədqiq edən ekspertlər üçün də sürpriz oldu. Əksər proqnozlar ondan ibarət idi ki, Paşinyan nisbi səslə qalib gələcək. Növbəti mərhələdə isə səs fərqi o qədər az olacaq ki, Robert Koçaryan Nikol Paşinyanın qalibiyyətini çox asanlıqla şübhə altına ala biləcək. Gözləntilərin tam əksinə olaraq, fərq o qədər böyük oldu ki, Koçaryan hər hansı bir formada bunu ciddi şübhə altına ala bilmədi. Və planlaşdırılan küçə hərəkatı da baş tutmadı. Bu səbəbdən Koçaryanın məğlub olması və məğlubiyyətdən sonrakı dövr ərzində də əl-qolunun bağlı olması Dağlıq Qarabağ ermənilərində müəyyən qədər frustrasiya və narazılıq yaradır. Əlbəttə ki, onların öz gələcəyi ilə bağlı mövcud olan qeyri-müəyyənliyin güclənməsi bu və ya digər formada Qarabağ erməniləri arasında özünü göstərməliydi. İndiki halda Araik Arutunyana qarşı ifadə olunmuş bir formada özünü büruzə verdi. Arutunyan özü bir qədər əvvəl Paşinyanın seçki qərargahında görüntüləndi. Belə məlum oldu ki, Qarabağ erməniləri arasında Paşinyanı dəstəkləyənlər var. Arutunyanın məsələ ilə bağlı ermənilər qarşısında cavab verməsinə ehtiyac yarandı və bu ehtiyac bütün bu prosesləri diktə etdi. Hesab edirəm ki, bu kontekstdə maraqlı proseslər hələ qabaqdadır”.

Politoloq Ermənistan və Qarabağ erməniləri arasında baş verən bölünmə barədə fikir bildirib: “Məsələ burasındadır ki, Paşinyan Ermənistan parlamentindəki müraciətində də "Bu cür ayrı-seçkilik salınmasın, Qarabağ erməniləri ilə digər ermənilər birdir” kimi bəyanatlar verdi. Hal-hazırda biz bu cür ayrı-seçkiliyi görürük. Buna bənzər fikri müharibədən sonra Serj Sarqsyan səsləndirmişdi. O, müsahibələrinin birində “2018-ci il Ermənistanda hakimiyyət çevrilişi anti-Qarabağ hərəkat idi” demişdi. Yəni Ermənistan erməniləri Qarabağı özlərindən uzaqlaşdırdılar və bəlli oldu ki, hakimiyyətə gələn Nikol Paşinyan bu və ya digər formada Qarabağı Azərbaycana qaytarmalıdı. Ona görə də, Qarabağ erməniləri və vaxtilə onlara rəhbərlik etmiş şəxslərdən biri olan Serj Sarqisyanın bu bəyanatı onu göstərir ki, Qarabağ erməniləri və  Ermənistan erməniləri arasında ciddi narazılıq var. Məlumata görə, Ermənistan erməniləri də artıq Qarabağ ermənilərini İrəvan küçələrində və digər küçələrdə görərkən hətta təhqir edirlər ki, onların həyatı son 30 ildə Qarabağ ermənilərinə görə dözülməz hala düşüb. Düşünürəm ki, Qarabağ və Ermənistan erməniləri arasında olan belə bir nifaq yeni hal deyil, çoxdan vardı. Bir müddət ola bilsin arxa plana keçsin, amma Ermənistanı tədqiq edən ekspertlər bu məsələdən xəbərdar idilər və bu heç də gözlənilməz bir şey deyildi”.

Gülnar Səlimova

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...