Türkiyədə bir neçə gündür davam edən meşə yanğınlarına görə məsuliyyəti “Alov uşaqları” terror təşkilatı üzərinə götürüb. “Alov uşaqları” terror təşkilatı PKK terror təşkilatına bağlıdır. Türkiyə rəsmiləri hələlik təşkilatın açıqlamasını şərh etməyiblər.
Qeyd edək ki, Daha əvvəl Türkiyənin ayrı-ayrı mətbu orqanları meşə yanğınlarında PKK terror təşkilatı üzvlərinin əli olması barədə məlumat yayıb. Qeyd edilib ki, Türkiyənin Manisa əyalətinin Turgutlu rayonunda PKK terror təşkilatının meşə yanğınları törətməkdə şübhəli bilinən üzvləri yaxalanıb.
Mövzu ilə bağlı Türkiyəli ekspert Engin Özer EDNews.net-ə açıqlama verib.
Onun szölərinə görə, bu həftə Rodos adasında da yanğınlar başlayıb:
“Aralıq dənizinin şərq hissəsində temperatur çox yüksək olub. Yəni yanğınlar yalnız Türkiyədə baş verməyib. Həmçinin, son illərdə Türkiyədə yanğınlar artıb. PKK-nın daha öncə də meşə yanğınları törətdiyini və bununla təhdid etdiyini bilirik. Amma PKK bəzən özü etmədiyini də üzərinə götürüb. Müəyyən bir yerdə münaqişə olur, PKK hər hansı bir məsələ ilə bağlı məsuliyyəti öz üzərinə götürürlər.
Hazırda yanğınlarla bağlı sabotaj ehtimalı araşdırılır. İndiki vaxtda bunu PKK-nın edib-etmədiyini demək doğru olmaz. Amma son illərdə bütövlükdə dünyada Amazondan Aralıq dənizi və hətta Avstraliyaya qədər qlobal istiləşmə səbəbilə yanğınların sayı artıb. Ancaq Türkiyə ilə bağlı məsələdə yanğına zamanında müdaxilə edilməməsi, əlimizdəki təyyarə sayının kifayət qədər olmaması və xarici yardımı tez bir vaxtda ala bilməməyimiz üzərində durmalıyıq.
Türkiyədə çox ciddi yanğınsöndürmə təyyarəsi çatışmazlığı var. Bu məsələdə hökumət uğursuzluqla qarşılaşdı. Bundan sonra artıq məhkəmə prosesi həyata keçiriləcək. Bir neçə gün içərisində araşdırmanın nəticələri ictimaiyyətə açıqlanacaq”.
Gülnar Səlimova
Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır