Aldığımız elə silahlar var ki, onun dəyəri Ermənistanın hərbi büdcəsinə bərabərdir - Hərbi ekspert - ednews.net

4 Dekabr, Şənbə

Aldığımız elə silahlar var ki, onun dəyəri Ermənistanın hərbi büdcəsinə bərabərdir - Hərbi ekspert

Analitika A- A A+

2022-ci ildə Ermənistanın müdafiə büdcəsi 11 faiz artacaq.  Ermənistanın baş naziri Nikol Paşinyan bu barədə gələn ilin dövlət büdcəsi layihəsini parlamentdə təqdim edərkən məlumat verib.

Ümumilikdə isə müdafiəyə 345 milyard dram (təxminən 725 milyon dollar ) ayrılacaq.

"2022-ci il üçün müdafiə büdcəsi 2021-ci illə müqayisədə 11% çox olacaq və bu rəqəm 345 milyard dramdan çoxdur. Ermənistanda peşəkar bir ordu yaratmaq niyyətindəyik, amma bunu düşünülmüş addımlarla edəcəyik", - Paşinyan deyib.

Qeyd edək ki, Ermənistan hərbi büdcəsinə ayrılan 750 milyon dollar Azərbaycanın hərbi xərclərindən təxminən üç dəfə azdır.

Ümumiyyətlə, 44 günlük müharibə ərzində Azərbaycan Silahlı Qüvvələri tərəfindən darmadağın edilmiş Ermənistan ordusunun 750 milyon dollar və ya bundan daha yuxarı müdafiə xərcləri ilə uzun müddət ərzində özünə gəlməsi nə dərəcədə mümkündür? Həqiqətənmi, Ermənistan ordusu bu ayrılan məbləğdən xeyr əldə edə bilər?

Məsələ ilə əlaqədar EDNews.net-ə açıqlama verən hərbi ekspert Üzeyir Cəfərov hesab edir ki, Azərbaycan ordusu öz iradəsi, güclü silahları və yüksək səviyyədə hərbi əməliyyatları yolu ilə Ermənistan ordusunu məhv edib. Demək olar ki, Ermənistan ordusu bu gün yox səviyyəsindədir.

Üzeyir Cəfərov: “Azərbaycan ordusunun güclənməsini istəmirlər”

“44 günlük müharibə nəticəsində Ermənistan ordusu darmadağın edilib. Bu ordu artıq ortalıqda yoxdur. Yalnız pərakəndə vəziyyətində başıpozuq erməni dəstələri var. Ermənistan ordusuna elə bir zərbə endirmişik ki, onun uzun müddət ərzində özünə gəlməsi müşkül məsələdir. Heç kəs sübut edə bilməz ki, müharibədə xeyli sayda canlı qüvvəsini və texnikasını itirən bir ölkənin ordusu qısa bir zaman ərzində normal vəziyyətə qayıda bilsin”, - deyə Ü.Cəfərov bildirib.

Ekspert hərbi büdcənin artırılmasının Ermənistan ordusuna heç bir fayda verməyəcəyini bildirib.

“Ermənistan hakimiyyəti görüntü yaratmaq üçün hərbi büdcəni artırmağa məcburdur. Onlar bununla heç nəyə nail bilməyəcəklər. Çünki ordunun yenidən qurulması və formalaşması onlar üçün çətin olacaq. Ermənistan hərbi qüvvələri ilk öncə formal olaraq toplanmalıdır. Sonra isə ordu bir sıra təcrübələrdən keçməlidir. Düşünmürəm ki, hərbi xərcləri artırmaq yolu ilə Ermənistan ordusunu qısa müddət ərzində yenidən qurmaq mümkün olsun. Azərbaycanın aldığı elə silahlar var ki, onun dəyəri Ermənistanın hərbi büdcəsinin dəyərinə bərabərdir. İstər 750 milyon olsun, istərsə 800 milyon onlara heç bir kömək edə bilməyəcək”, - deyə Cəfərov qeyd edib.  

“Ermənistanda hakimiyyət bundan sonra nə eləyəcəksə özü bilər. Bu bizi maraqlandırmır. Ağılları başında olsa düzgün qərar verə bilərlər. Ağılları başında olmasa və səhv addım atmağa davam etsələr yenidən ağır nəticə ilə üzləşəcəklər. Hər halda seçim onlarındır. Bölgədə normal yaşamaq istəyirlərsə ağıllarını başlarına toplasınlar və düzgün qərar versinlər. Özlərinin və havadarlarının səhvləri və günahları ucbatından bu cür ağır iqtisadi və sosial duruma düşüblər. Burada yaxşı məsəl var:  Özü yıxılan ağlamaz”.

Yunis Abdullayev

6.3.4. ictimai və dövlət maraqlarının müdafiəsi; 

 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...