Millətin dili, onun namusu və gələcəyidir. Milləti millət edən amil, onu digər millətlərdən fərqləndirən detal məhz dildir, ana dilidir. Ona görə də ana dilinin müdafiəsi və mühafizəsi bütün millətin ən böyük vəzifəsi sayıla bilər.
Eyni zamanda, milləti millət edən digər amilsə onun həmrəyliyidir. Həmrəyliyi olmayan, parçalanmış toplum məhvə məhkumdur. Ona görə də milli dəyərləri, o cümlədən müqəddəs ana dilini qoruyub saxlamaq üçün təfriqə yaradıb, xalqı-xalqa qarşı qoyub, zorakılıqlara və iğtişaşlara təşviq etmək, ana dilinə yox, anamıza, Azərbaycana qarşı böyük bir xəyanətdir.
Bu müraciət xarakterli girişin səbəbi ötən günlərdə bir internet televiziyasında qonaq olan Azərbaycan Demokrat Partiyasının lideri Sərdar Cəlaloğlunun səsləndirdiyi radikal fikirlərdir. Belə ki, Cəlaloğlu öz çıxışında deyib: “Bu gün övladlarına rus dilində təhsil verən Azərbaycan vətəndaşlarının hər biri Azərbaycan dövlətinə, müstəqilliyinə, suverenliyinə xəyanət edən insanlardır. Qarabağ müharibəsində 3 min şəhid vermişik, şəhidlərimizin qanı sadəcə ermənilərin yox, övladlarına rusca təhsil verən, rus dilində təhsil alan 34% azərbaycanlıların da əlinə bulaşıb. Onlar müstəqilliyimiz, ərazi bütövlüyümüz üçün canlarından keçiblər, rusdillilər isə Azərbaycan üçün ən böyük təhdidi yaradan elektorata çevriliblər. Qazaxıstanda bir qrup var ki, gəzirlər, kimsə rusca danışanda ona dərhal zorakılıq tətbiq edirlər ki, nə üçün rusca danışırsan. Azərbaycanda rus dilində məktəbləri açan təşviq edən insanlar, direktorundan prezident administrasiyasına qədər Azərbaycan dövlətinin düşmənidir”.
Öncə qeyd edək ki, bir məsələdə Sərdar Cəlaloğlu haqlıdır: Azərbaycanda hər bir şəxsin ana dilində oxumasını təşviq etmək və buna nail olmaq lazımdır. Rus dili isə ingilis, fransız, ərəb dili kimi ölkədə ikinci, üçüncü və neçənci dil kimi öyrənilsə, daha yaxşı olar. Bu, ziyan deyil, çox böyük faydadır. Lakin Sərdar bəy rus dilinə olan bu axını durdurmaq üçün anormal bir təklif irəli sürür. Qazaxıstandan örnək göstərərək bir növ çağırış edir ki, ölkəmizdə də rusca danışan insanlara qarşı zorakılıq tətbiq edilsin. Bu isə ölkədə iğtişaşlara çağırış sayıla bilər. İxtisası hüquqşünas olan Sərdar bəy bilmirmi ki, hüquqi dövlətdə problemlər zorakılıq deyil, qanun tənzimlənməsi yoluyla həll edilməlidir?
Bundan savayı, rusdilli vətəndaşlarımızı “vətən xaini”nə çevirmək, ölkədəki yüz minlərlə insana həqarət, onların haqqına girməkdir! Bu, həm də milli həmrəyliyi baltalamaqdır. Fərqli dil Vətəni sevməmək deyil! Fərqli dil Vətənə xəyanət deyil! Ölkəmizdə doğma dili talış, avar, ləzgi, rus dili olan, amma Vətəni Azərbaycanı psevdovətənpərvərlərdən qat-qat çox sevən yüz minlərlə vətəndaşımız var. Rus dilində təhsil alıb Vətəni Azərbaycan üçün həyatını qurban verən şəhidlərimiz var!
Rus dilində təhsil almış gənclərimizi qınaq obyektinə çevirmək, onları, ailələrini sırf xarici dildə təhsil alıblar deyə xəyanətdə ittiham etmək, bununla da ölkənin şagird və tələbələrinin 35%-ni hədəfə çevirmək Azərbaycan xalqını parçalamaqdan başqa nəyə və kimə xidmət edir?
Əlbəttə, rus dilli məktəblərin sayı azalmalı və övladlarımız ana dillərində, milli ruhda təhsil almalıdır. Lakin bunun yolu onları və ailələrini təhqir etməkdən yox, Azərbaycan dilində təhsil verən orta və ali məktəblərin təhsil səviyyəsini yüksəltməkdən keçir. Azərbaycan dilində təhsil verən müəssisələr yüksək keyfiyyətləri ilə seçilib, milli brendə çevrilsələr, Azərbaycan dilində yazılan təhsil kitabları qüsurları ilə deyil, mükəmməlliyi ilə seçilsələr, o zaman heç bir zorakılığa, təhqirə və təzyiqə ehtiyac qalmadan azərbaycanlı vətəndaş övladını ana dilində təhsilə istiqamətləndirəcək.
Cəlaloğlu kimi şəxsin belə radikal bəyanatlarını gördükcə nə üçün Azərbaycanda sağlam müxalifətin qurulmadığını dərk edirsən. Biri xalqın pullarını oğurlayan korrupsiyaçını bu gün lider elan edir, digəri sivil, siyasətdən uzaq vətəndaşları xain adlandırır, başqa biri dini və siyasəti anlamadan peyğəmbəri özünə siyasi öndər (!) görür! Onların təklif etdiyi yol isə ancaq Azərbaycanı parçalanmağa aparır. Onlar varkən erməni kimi düşmənə nə ehtiyac qalır?
Hansısa səbəbdən rusca təhsil alan şəxslər haqqında vətən xaini hökmü çıxaran Cəlaloğlu, qardaşı Qurban Məmmədov kimi bu milləti parçalayan separatçı deyilmi?
Nicat İsmayılov
Məqalə Azərbaycan Respublikası Medianın İnkişafı Agentliyinin maliyyə dəstəyi ilə hazırlanmışdır
6.3.15. dini və milli tolerantlıq, millətlərarası münasibətlərin inkişaf etdirilməsi