Rusiya hökuməti Qərbi gizli provokativ siyasi fəaliyyətdə günahlandırıb. Rusiya Xarici İşlər Nazirliyinin sözçüsü Mariya Zaxarova Böyük Britaniyanı qrantlar verməklə Rusiyanın daxili siyasi vəziyyətini sarsıtmağa yönəlmiş proqramları maliyyələşdirdiyini deyib. Bundan əlavə, Zaxarova yayılan sənədlərin birbaşa Böyük Britaniya tərəfindən Rusiyanın daxili işlərinə müdaxiləsinə işarə etdiyini vurğulayıb.
Diplomatın sözlərinə görə, rəsmi London 2020-2023-cü illər üçün ictimai təşkilatlara, Rusiyanın dövlət qurumlarına təsir proqramlarının maliyyələşdirilməsinə və s. işlərə 1,3 milyard rubldan çox vəsait ayırıb.
Zaxarova həmçinin qeyd edib ki, Böyük Britaniyanın sabiq baş naziri Tereza Mey hələ 2017-ci ilin noyabrında Rusiyaya “düşmən dövlət” statusu verərək, Rusiyaya qarşı 100 milyon funt sterlinq (139,65 milyon dollar) ayırıb.
Rusiya hökuməti bu cür işlərdə medianın da rolunu qeyd edib. Məlumatda deyilir ki, ötən il fevralın 18-də “Anonimus” adlı hakerlər qrupu “Thomson Reuters” və “BBC Media Action” fondlarının Rusiyaya qarşı gizli informasiya müharibəsində iştirak etdiyini iddia edən sənədlər dərc edib.
Beləliklə, Britaniya XİN tərəfindən idarə olunduğu deyilən bu tip əməliyyatlar rəsmi Kremli qəzəbləndirib. Eyni zamanda, Zaxarovanın fikirləri ortada bir qədər ciddi suallar doğurub. Rusiya ABŞ-ın da bu işlərin arxasında olduğunu bildiyi halda, nəyə görə məhz Britaniyanı ittiham edir? Rusiyanın Britaniyanı hədəfdə almaqda məqsədi nə ola bilər?
Mövzu ilə bağlı EDNews.net britaniyalı jurnalist Neil Uatsonun şərhini alıb.
“Zaxarovanın fikirləri Rusiyanın Qərbə qarşı olan tarixi şübhələri ilə bağlıdır. Xüsusilə II Dünya Müharibəsindən sonra ABŞ-la Britaniya bir-birinə çox sıx bağlı dövlətlərə çevrildi və həmin dövrdən sonra Britaniya ilə ABŞ hər zaman eyni havanı çalmağa başladı. Odur ki, Qərbin bu kimi münasibəti Putinin hakimiyyətə gəlişindən sonra Rusiyada bir növ paranoyya formalaşdırıb və hər bir addımına şübhə ilə baxır”.
Britaniyalı jurnalist eyni zamanda, Zaxarovnın bəyanatının həqiqətə uyğun olduğunu da təsdiq edib.
“Düzünü desəm, Mariya Zaxarovanın şərhlərində müəyyən qədər həqiqət var. Bunu İngiltərədə mövcud olan güclü rusofobiya ilə də izah etmək mümkündür. Britaniya mediasına baxsanız siz də görərsiniz ki, Krımdakı vəziyyətlə əlaqədar Rusiya beynəlxalq təhlükəsizliyə təhdid kimi qələmə verilir və ən əsası prezident Putin hər gün Böyük Britaniya mediasında təhqir olunur”, - o, deyib.
Həmçinin jurnalist bunun səbəblərinə də izah edib: “Böyük Britaniyanın Rusiyaya bu kimi yanaşmasının arxasında müəyyən daxili və xarici səbəblər var. Ən əsası, hökumət Covid böhranı və Brexit ilə bağlı tənqidlərdən yayınmaq üçün bəhanə olaraq, demək olar hər gün mediada Rusiya əleyhinə şərhlər yazır və geniş analitik yazılar dərc edir. Ümumiyyətlə prezident Putin Böyük Britaniya hökuməti tərəfindən ciddi problem kimi qəbul edilir və mən inanıram ki, Böyük Britaniya Təhlükəsizlik Xidmətləri saysız-hesabsız üsullarla “rejim dəyişikliyinə” nail olmağa çalışır. Onlar ideal olaraq Kremldə daha zəif və ya daha çevik birinin olmasını istəyir. Onu da əlavə edim ki, Rusiyada Putin rejiminin devrilməsi həm ticarət, həm də ölkə daxilində ictimai rəy baxımından ABŞ və Böyük Britaniya hökumətlərinin əsas məqsdələrindən biridir”.
Neyl Uatson Rusiya-Britaniya münasibətlərdəki davam edən proseslərə və bundan sonrakı nəticələr barədə rəyini bildirib.
“Əslində “Soyuq Müharibə”dən sonra Britaniya ilə Rusiya arasındakı münasibətlər öz möhürünü qoymuş oldu. Üstəlik Ukraynadakı vəziyyətlə ağlı Rusiyaya tətbiq olunan sanksiyalar münasibətləri daha da böhran vəziyyətinə gətirib çıxardı. Fikrimcə bundan daha betəri ola bilməz.
O ki qaldı münasibətlərin normallaşmasına, hesab edirəm bu yalnız Putin rejiminin devrilməsindən sonra mümkündür. Bunun əksi mümkün deyil”.
Elnur Ənvəroğlu