AMEA prezidenti Ramiz Mehdiyevə qarşı narazılıq getdikcə artır. Parlamentdən mətbuata, elmi insitutlardan siyasi partiyalara qədər bir çox sahələrdə Mehdiyevə qarşı etiraz səsləri ucalır. Gün olmur ki, Mehdiyev əleyhinə bir bəyanat verilməsin, məqalə yazılmasın.
Xüsusilə AMEA daxilində Mehdiyevə qarşı “məxməri inqilab”ın ilk işartıları müşahidə edilir. Tarix insitutunun baş direktoru, professor Kərim Şükürovun Mehdiyevi istefaya çağırmasına digər insitutların elmi işçiləri də qoşulmaqdadır. Beləliklə, Tarix insitutunun öndəliyində Mehdiyevə qarşı AMEA daxilində aparılan inqilabı hərakat genişlənir. Buna səbəb bu sivil etiraz dalğasına ölkə ictimaiyyətinin, xüsusilə mətbuat və parlament nümayəndələrinin geniş dəstək verməsidir.
Son günlər AMEA koridorlarında gəzən söz-söhbətlərə görə, artıq Mehdiyevin “qələmi qırılıb” və bu yaxınlarda istefa verməsi gözlənilir. Hətta kulislərdə Mehdiyevdən sonra Azərbaycanın Baş aliminin kim olacağı müzakirə edilir.
Məhz belə bir dövrdə, 2 fevral tarixində sabiq “boss kardinal” AMEA Rəyasət Heyətini başına toplayıb iclas keçirib. İclasda müzakirəyə çıxarılan məsələlərin içərisində isə Mehdiyevin istefasına dair heç bir müddəa yer almayıb.
Ənənəvi qaydada keçirilən iclasla birlikdə AMEA-nın saytında Arxeologiya, Etnoqrafiya və Antropologiya İnstitutunun baş direktoru professor Abbas Seyidovun məqaləsi yayımlanıb. Seyidov bu məqalədə Mehdiyevə qarşı yönələn hücumları pisləyib və onun “uğurlu” islahatlarından bəhs edib. Professor Seyidov Mehdiyevi tənqid edənləri “qaragüruh” adlandırıb.
Beləliklə, AMEA-nın sonuncu iclas və məqalədən belə aydın olur ki, Mehdiyev özünə qarşı yönələn etiraz dalğasına açıq şəkildə mesaj verir: “Mən buradayam və heç yerə getmək niyyətim yoxdur!”
Qeyd edək ki, Ramiz Mehdiyev nə az, nə çox 44 il Azərbaycanda bu və ya digər səviyyədə, müxtəlif vəzifələrdə dövlət idarəçiliyində iştirak edib. Son 25 ildə Mehdiyevin adı korrupsiya, dövlət daxilində paralel qruplaşma formalaşdırma, vəzifə səlahiyyətlərini aşma və s. kimi onlarla qanuna zidd fəaliyyətlərdə hallanıb.
İndi isə bu qədər cinayətlərdə adı hallanan şəxsi Azərbaycan elminin səviyyəsini aşağı salmaqda ittiham edirlər.
Bəs, həqiqətənmi Azərbaycan elminin əsas problemi Ramiz Mehdiyevdir?
Hələ Ramiz Mehdiyev AMEA prezidenti təyin edilmədən əvvəl görkəmli akademik, rəhmətlik Hətəm Quliyevlə Azərbaycan elminin problemlərinə dair maraqlı bir söhbətimiz olmuşdu. O zaman Hətəm müəllimdən soruşmuşdum ki, yeni Hətəm Quliyevlərin yetişməsinə nə mane olur? Sözün həqiqi mənasında böyük alim mənə belə cavab vermişdi:
“Mən Geologiya insitutunda şöbə müdiri vəzifəsində çalışanda nazirin maaşı qədər məvacib alırdım. O dövrdə alimin, akademikin ayrı və böyük bir nüfuzu var idi. İndisə gənc alimlər ailələrini saxlaya bilmirlər. Kimi yetişdirdiksə ya xaricə üz tutdu, ya da başqa sahədə iş tapdı...”
Nicat İsmayılov