”Ukraynaya hərbi müdaxilə siyasi və hərbi baxımdan böyük itkilər verəcək. Hətta Rusiya Ukrayna paytaxtını zəbt etsə də belə siyasi baxımdan o uduzmuş olacaq. Çünki hamı başa düşməlidir ki, Ukraynanın 30 illik müstəqillik dövründə orda təzə nəsil formalaşır. Bu təzə nəsil artıq öz dövlətini müstəqil dövlət kimi bilir və onu qoruyacaq. Əsas problemlər hərbi əməliyyatlardan sonra başlayacaq”.
Bu sözləri Ednews-a sabiq xarici işlər naziri Tofiq Zülfüqarov Ukrayna-Rusiya münaqişəsindən danışarkən deyib. Siyasi analitik təəssüflə qeyd edib ki, Ukrayna birmənalı olaraq geopolitik oyunların qubanına çevrilib.
“Bu oyunlar Qərb ilə Rusiya arasında olan oyunlardır. Mən hazırki prosesləri qismən də olsa gələcəkdə baş verən kollektiv Qərb və Çin arasında olan rəqabətin bir hissəsi kimi qəbul edirəm”.
Tofiq Zülfüqarov hərbi əməliyyatların nəticəsi olaraq Rusiyaya tətbiq olunacaq sanksiyalardan da danışıb.
“Təbii ki, iqtisadi baxımdan Rusiyaya qarşı sanksiyalar olacaq. Amma onların əsas məqsədi Rusiya iqtisadiyyatını zəiflətməkdir və buna nail də olacaqlar. Fikrimcə, Qərbin növbəti taktikası Rusiyanın siyasi elitasına qarşı ölkənin daxilində hansısa prosesləri başlatmaqdır. Demək olar ki, qərb qüvvələri bunun üçün çalışır və bu siyasət gec ya tez özünü biruzə verəcək. Artıq Rusiya siyasi elitasında gərginlik mövcuddur və son proseslərin nəticəsində bu gərginlik daha da güclənəcək. Rusiyanın Təhlükəsizlik Şurasının iclasını buna misal gətirmək olar. TŞ-da baş verən və ictimaiyyətə çatdırılan proseslərdən belə qənaətə gəlmək olar ki, orada çox böyük fikir fərqliliyi var”.
Politoloq NATO-nun Ukraynanı dəstəkləyərək hərbi əməliyyatlara müdaxilə etməyəcəyini də vurğulayıb. O, bildirib ki, əgər alyansın belə fikri olsa idi, müharibədən əvvəl Ukraynaya hərbi yardım göstərərdi.
“NATO təəssüflər olsun ki, hərbi əməliyyatlardan da əvvəl Ukraynaya yetərli köməklik göstərməyib. Ukraynanın hərbi hava müdafiə sistemləri olmadığına görə əsas müqavimət mərkəzləri şəhərlər və hansısa qəsəbələr ola bilər.
Düşünürəm ki, hərbi əməliyyatların nəticəsində Ukraynada partizan şəklində müqavimət dalğası olacaq”.
Sonda Tofiq Zülfüqarov bildirib ki, post hərbi əməliyyatlar dövrünü nəzərə alsaq, Ukrayna-Rusiya arasında davam edən hərbi əməliyyatların hərbi-siyasi nəticələri ən azı bir neçə il davam edə bilər.
“Bu müddət ərzində Ukraynanın Rusiyaya qarşı müqavimətləri müxtəlif formalarda davam edəcək. Hətta müəyyən mərhələdə böhranın Rusiya ərazisinə keçməsinə əminəm”.
Gülnar Səlimova