Ermənistanda son zamanlar radikal müxalifətin nümayişləri artıq kütləvi və daimi xarakter almağa başlayıb. Paytaxt İrəvan və bəzi regionlarda itaətsizlik adı altında hərəkət edən nümayişçilər yolları bağlayır və digər sərt tədbirlərə əl atırlar.
Ölkədə baş verən proseslər siyasi vəziyyətin daha da gərgin olacağından, hətta yaxın zamanda ciddi qarşıdurmanın baş verəcəyindən xəbər verir.
Bununla bərabər, bəzi siyasi şərhçilər Ermənistan ordusunun və digər silahlı qüvvələrin nümayişlərə qatılıb çevriliş edəcəyi barədə iddialar da səsləndirirlər.
Lakin hərbi ekspert Heydər Mirzə səsləndirilən iddiaları əsassız adlandırır. O, Ednews – a açıqlaması zamanı Ermənistanda nümayişləri təşkil edən şəxslərin öz siyasi məqsədlərinə nail olmaq üçün ordunun köməyinə ehtiyac duymadığını qeyd edib.
“Robert Köçəryan, Serj Sarkisyan, Artur Vanetsinyan və digər radikal müxalif nümayəndələrini Rusiyapərəst və anti-Paşinyan mövqeyi birləşdirir. Bu şəxslər birləşərək öz siyasi məqsədlərinə ordunun müdaxiləsi olmadan da nail ola bilərlər. Sadəcə, burada başqa problemlərin də mövcud olduğunu nəzərə almaq lazımdır. Müxalifətin nümayişləri hələ də ciddi şəkildə kütləvi xarakter almayıb. Bununla yanaşı, hazırki nümayişlərdə Qarabağ məsələsindən əsas alət kimi istifadə olunmasına baxmayaraq, burada həmçinin sosial və iqtisadi problemlər də qabardılır”.
Ekspert Köçəryanın və Sarkisyanın orduda güclü dayaqlarının olduğunu istisna etməyib: “Onlar bu dayaqlarından məharətlə istifadə edə bilərlər. Bu səbəblərə görə, ordunun siyasi vəziyyətə müdaxilə etməsi və nümayişçiləri dəstəkləməsi ehtimalı ola bilər. Məsələn, Ağdərədə qanunsuz erməni briqadasının rəhbəri Serj Sarkisyana yaxın olan şəxsdir. O şəxsin arasında Rusiya dayandığı üçün Paşinyan ona toxuna bilməyib”.
Heydər Mirzə İrəvanda nümayişlərə yüksək təbəqədən olan şəxslərin də qatılması barədə də danışıb.
“Həmin şəxslər Köçəryanın və Sarkisyanın hakİmiyyəti dövründə rüşvətxorluq və digər qanunsuz yollar ilə milyonlar əldə ediblər və özlərinə sərvət yığıblar. Bu imkanlı şəxslər öz maliyyəsindən istifadə edib daha çox sakinin nümayişlərə qatılmasına, o cümlədən təbliğatın daha geniş yayılmasına imkan yarada bilərlər”.
Hərbi ekspert həmçinin qeyd edib ki, Köçəryan-Sarkisyan cütlüyünün hakimiyyətə gəlmələri bölgədə növbəti müharibə riskini yaratmayacaq.
“Paşinyanın hazırda yürütdüyü diplomatiya siyasətinə radikal müxalifətin rəsmiləri də əməl etməkdən başqa alternativ yol görməyəcəklər. Köçəryan, Sarkisyan və Vanetsinyan kimi revanşist ünsürlər Rusiyadan daha möhkəm yapışmaqla bərabər öz sərt millətçi ritoriklarına azaltmağa məcbur olacaqlar. O ki qaldı müharibə riskinə, Azərbaycan ordusu ilə növbəti hərbi qarşıdurmanın baş verməsi inandırıcı görsənmir. Ermənistan ordusunun əvvəlki vəziyyətinə qaytarılması üçün illər sərf edilməlidir. Bu ölkədə ordunun tez bir zamanda güclənməsi üçün heç bir imkan və resurs yoxdur”.
Ermənistan və Azərbaycan arasında sülh prosesinə gəlincə isə, Heydər Mirzə bölgədə davamlı və əbədi sülhün mövcud olması Moskvanın geostrateji maraqlarına xidmət etmədiyini bildirib.
“Kreml hazırda əsas diqqətini Ukraynada apardığı müharibəyə yönəldib. Belə vaxtda Moskva onun izni olmadan bu regionda hər hansı hadisənin baş verməsini qəbul etməyəcək. Rusiya rəhbərliyi özünü regionın yeganə ağası hesab etdiyindən Ermənistan-Azərbaycan münasibətlərinin normallaşması prosesində başqa faktorların vasitəçiliyini görmək istəmir. Kreml məhz bu səbəblərə görə, İrəvanda öz əlaltısı radikal müxalifətin nümayişlərinə təkan verir. Vanetsinyanın Moskva səfərindən sonra nümayişçilərin meydanlara axışması bunu aydın sübut edir. Sözün əsil mənasında Rusiya regionda nə müharibənin, nə də sülhün olmasını istəyir”.
Yunis Abdullayev