Azərbaycan Diaspora Komitəsinin təşkilatçılığı ilə 11-16 iyun tarixlərində İsrail, Böyük Britaniya, Fransa və dünyanın müxtəlif ölkələrindən tanınmış siyasətçi, diplomat və jurnalistlərin Azərbaycana səfəri təşkil olunub. Görüş çərçivəsində nümayəndə heyətinin işğaldan azad edilən Ağdam şəhərinə səfəri təşkil olunub. Qonaqlar Qarabğın minalanmış əraziləri, vacib problemlər və gündəmdə olan prioritet məsələlər haqda məlumatlandırılıb. Ağdam səfərindən sonra qonaqlarla ADA Universitetində “Cənubi Qafqazda post-münaqişə dövründə inkişaf” adlı dəyirmi masa görüşü keçirilib.
Heyət arasında Azərbaycana səfər edən İsrailin keçmiş Rabitə naziri, hazırda İsraildə fəaliyyət göstərən İqtisadi Sülh Mərkəzinin prezidenti Ayub Kara Ağdam səfəri, habelə Azərbaycanda olduğu müddətdə iştirak etdiyi görüşləri barədə təəssüratlarını Ednews-la bölüşüb. O, həmçinin qeyd edib ki, hazırda İsraillə Azərbaycan arasında münasibətlər ən yüksək zirvəsini yaşayır.
İsrailli diplomat ilk növbədə İsraillə Azərbaycan arasında olan münasibətlərin əhəmiyyətindən söz açıb.
“İlk öncə qeyd etməliyəm ki, mən hələ parlamentdə daha sonra hökumət qurumlarında fəaliyyətdə olduğum dövrlərdən İsraillə Azərbaycan arasında münasibətlərin möhkəmləndirilməsi, və Azərbaycan hökumətinə dəstək təşəbbüsündə bir sıra xidmətlər göstərmişəm. Xüsusilə İsrailin Rabitə naziri vəzifəsində olduğum zamanda mənim Azərbaycan hökuməti və Rabitə Nazirliyi ilə kibertəhlükəsizlik, internet, rəqəmsal texnologiyalar, peyk texnologiyaları və sırf bu kimi sahələrdə əməkdaşlıq görüşü və müzakirələrimiz olub. Azərbaycan və İsrail dövlətlərinin həyata bir baxışı var və bu baxışlar bizi bir arada birləşdirir,” – deyə, sabiq nazir belə vurğulayıb.
Diplomat həmçinin Cənubi Qafqazda Ermənistanın mövqeyi və bu əlaqələrdə onun da cəlb olunmasına toxunub.
“Cənubi Qafqazın qonşuları, xüsusilə Ermənistan artıq Azərbaycanla İsrail arasındakı yaxın əlaqələri açıq-aydın görür. Bu həm də onlara yeni dövrə addım atmaq üçün bir çağırış mesajıdır. Fikrimcə, Ermənistan Qarabağla bağlı olanlarla barışmalı və Azərbaycanın ərazi bütövlüyünə hörmət etməlidir. Hesab edirəm, yalnız bundan sonra Ermənistan müştərək əlaqələrdən faydalanmaq barədə düşünə bilər”.
Ayub Kara həmçinin Azərbaycana səfərinin məqsədi barədə və gələcəkdə Ermənistanla Azərbaycan arasındakı əlaqələrin inkişaf etdirilməsi barədə də söz açıb.
“Bu gün mən burada bir çox vacib məqamlarla tanış oldum və yerli hökumət nümayəndələri ilə birgə müzakirələr etdik. Bundan əlavə, işğaldan azad olunan Ağdam rayonuna səfərimiz oldu və orada dəhşətli dağıntıların şahidi oldum. Minalanmış ərazilər - bu dövrümüzün ən böyük fəlakətidir. İsrail hökumətinin bir nümayəndəsi olaraq mən çox istərdim Ermənistanla Azərbaycan arasında qonşuluq əlaqələrinin gücləndirilməsinə dəstək olum. Elə məhz bu səbəbdən biz bu gün buradayıq”.
Ağdamda olduğu zaman minalanmış ərazilərdən təsirlənən israilli sabiq nazir bu sahədə İsrail hökumətinin Azərbaycana hansı formada texnoloji dəstək göstərə biləcəyi məsələsinə toxunub.
“Minalanmış Qarabağ torpaqlarının aqibəti bizi də çox təsirləndirir. Həm sevinirik həm də ən azı sizin qədər həmin torpaqların altında gizlənən mina təhlükəsindən narahatlıq duyuruq. Səfərimiz zamanı biz minaların təmizlənməsi sahəsində Azərbaycana texnoloji cəhətdən dəstək ola biləcəyimizi bildirdik. İsrail ərazilərin minalardan təmizlənməsi sahəsində yeni robot texnologiyanı ixtira edib. Artıq heç bir əl əməyi olmadan həmin robot qurğular vasitəsilə istənilən növ minalar torpağın müxtəlif dərinliyindən təhlükəsiz şəkildə çıxarılaraq zərərsizləşdirilə bilir. Bu barədə Azərbaycan hökumət nümayəndələrinə ətraflı məlumat verdik və təkliflərimizi etdik”.
Keçmiş nazirin sözlərinə görə, həmin robotlar artıq xəritələrə ehtiyac duymadan Qarabağın bütün ərazilərini qarış-qarış təmizləyə biləcək.
“Azərbaycan hökuməti dəfələrlə Ermənistan tərəfinə mina xəritələri barədə müraciətlər edib və nəticədə bir çox xəritələr öz doğruluğunu təsdiq etməyib. Bizim təklif etdiyimiz robot texnologiya artıq hər bir ərazini xəritəyə ehtiyac olmadan hər bir santimetrinə qədər minadan təmizləyə biləcək. Bu həm də minaların təmizlənməsi üçün müəyyən olunan zamanı da minimuma endirəcək”.
Elnur Ənvəroğlu