Ermənistanın Qarabağla bağlı həyəcanı xeyli artmaqdadır. Öncə anti-terror əməliyyatları, daha sonra isə 22 fevral tarixində Rusiya ilə Azərbaycan arasında imzalanan 43 maddəlik müttəfiqlik sazişinin 11-ci bəndi erməni ictimaiyyətində geniş narahatlığa səbəb olub. 

Erməni xofu, cavabsız suallar...

Qeyd olunan tarixdə Moskvada imzalanan müttəfiqlik sazişi bir qədər sual doğuran məqamları özündə ehtiva etsə də, sənəddə yer alan xüsusilə 1 və 11-ci maddələr Azərbaycanın lehinədir. Belə ki, 11-ci maddəyə görə sazişdə qeyd olunan  “Rusiya Federasiyası və Azərbaycan Respublikası öz ərazilərində təşkilatların və şəxslərin digər tərəfin dövlət suverenliyinə, müstəqilliyinə və ərazi bütövlüyünə qarşı yönəlmiş fəaliyyətinin qarşısını qətiyyətli surətdə alırlar” ifadəsi ölkəmizin maraqlarına cavab verir. Məhz bu bənd ötən gün mediaya açıqlama verən erməni politoloq Artak Akopyanın dilində belə hallanıb:

“Ukrayna müharibəsi ilə məşğul olan Rusiya Azərbaycanın o tələbinə yenidən müqavimət göstərmək istəməyəcək. Xüsusən də Azərbaycan öz tələblərini Türkiyə ilə razılaşdırdığına görə, bu məsələ belə də həll olunacaq. Müsbət addım atdıqdan sonra isə Türkiyə Kremlə bizim hesabımıza azərbaycanlılara təzminat tələb edəcəklər”.

Ermənistanın yaratdığı hay-küy...

Siyasi ekspert Mətin Məmmədli yaranan prosseslərlə bağlı Ermənistanın yaratmaq istədiyi hay-küyü Ednews-a açıqlamasında belə şərh edib: “Ermənistan cəmiyyətində Azərbaycanın son “Qisas” əməliyyatından sonra ciddi narahatlıqlarının olduğu müşahidə olunur, ancaq görünən odur ki, onlar bu narahatlıqlarını yenə də yanlış istiqamətdə ifadə edirlər. Şübhəsiz, Ermənistan cəmiyyətində müəyyən qüvvələr bu cür hay-küy qoparmaqla, Rusiyanı prosseslərə fəal müdaxiləyə təşviq etmək istəyir. Hesab edirəm ki, indiki mərhələdə onların bu cəhdi uğurlu alınmayacaq”.

Ekspert, həmçinin Rusiyanın Azərbaycanla birgə imzaladığı razılaşma sənədinin ortada olmasına baxmayaraq, onun bu bəyannamənin maddələrinə sadiq qalacağı barədə təminat verib verməyəcəyi barədə də fikir bildirib. 

“Azərbaycan hər zaman imzaladığı sazişlərə, müqavilələrə sadiqlik nümayiş etdirib və bu səbəbdən də qarşı tərəfdən də belə bir davranış gözləyib. Rusiya ilə imzalanan sazişin 11-ci maddəsi də tam icra olunmalıdır, bu kontekstdə rəsmi Moskvadan gözləntilərimiz böyükdür. Ümid edirik ki, Rusiya öz sözünə sonuna qədər əməl edəcək”. 

Zəngəzura gedən yol…

Mətin Məmmədli onu da əlavə edib ki, Azərbaycanın həyata keçirdiyi əməliyyatlar yalnız Qarabağla bitməyəcək. O, üçtərəfli imzalanan 10 noyabr 2020-ci il kapitulyasiya anlaşmasını rəhbər tutaraq, Azərbaycanın qarşıdakı atacağı addımların Zəngəzurla bağlı olduğunu da deyib. 

“Azərbaycanın həyata keçirdiyi əməliyyatlar bütövlükdə üçtərəfli bəyanatın (10 noyabr 2020) tam həyata keçirilməsi ilə bağlıdır. Daha dəqiq desək, Ermənistan üçtərəfli bəyanatla üzərinə götürdüyü öhdəlikləri həyata keçirməlidir. O cümlədən də, Zəngəzur dəhlizinin açılması üçün də bütün səyləri ilə çıxış etməlidir. Görünür ki, üçtərəfli bəyanat yalnız Qarabağla bağlı deyil, daha geniş məsələləri əhatə edəcək. Ümid edirəm ki, ölkəmiz hərbi-siyasi təsir vasitələrindən davamlı olaraq istifadə etməklə Ermənistanla aramızda olan problemlərin tədricən həllinə nail olacaq”.

Elnur Ənvəroğlu 

• Tag:
• Elnur Ənvəroğlu
• Qarabağ
• Ermənistan