Şimali Koreya lideri Kim Çen In həmkarı Vladimir Putinin dəvəti ilə Rusiyaya səfər etdi. ABŞ rəsmiləri Rusiya ilə Şimali Koreya arasında silah danışıqlarının fəal şəkildə irəlilədiyini, Kim və Putinin Ukraynadakı müharibə üçün Rusiyaya silah verilməsini müzakirə edəcəklərini bildiriblər. Pxenyana gəlincə, bu, Şimali Koreya lideri üçün BMT-nin sanksiyalarını sarsıdan və uzun illər diplomatik təcrid vəziyyətindən çıxmaq şansıdır.
Qeyd edək ki, bu, 2020 – ci il pandemiyasından sonra Kim – in xaricə ilk işgüzar səfəridir.
Xatırlatmaq lazımdır ki, Şimali Koreya yüksək ticari əməkdaşlığlarına rəğmən Krımın Rusiya tərəfindən ilhaqını tanıyan sayılı ölkələrdən biridir. Lakin buna rəğmən Rusiya, KXDR – nin özünə qapanıq bir ölkə olmasından və Rusiyanın müharibədən əvvəl BMT çərçivəsində imzaladığı sazişlərdən dolayı olaraq iki ölkə arasınakı münasibətlərə pozitiv baxmırdı. Ümumiyyətlə, Rusiyanın SSRİ dağıldıqdan sonra Şimali Koreyaya münasibəti tamamilə dəyişmiş və Rusiya ona olan dəstəyini Pekin vasitəsi ilə edirdi.
Lakin görünür boşalmış ehtiyatlar və Qərb tərəfindən təcrid olunmuş iki köhnə müttəfiq təkrar bir araya gəlmək məcburiyyətində qalıblar.
Moskva və Pxenyan daha praqmatik bir hərbi tərəfdaşlığa gedə bilər , bu isə o deməkdir ki, Rusiya Şimali Koreyanın nüvə proqramını gücləndirə və bunun müqabilində əlavə silah bazaları ala bilər.
Beləliklə, Rusiya Pxenyana öz uzaqmənzilli raketlərində nüvə başlıqlarının effektiv istifadəsi üçün lazım olan texnoloji sursatı təmin edə bilər.
Maraqlısı ondadır ki, Şimali Koreyadan hərbi-sursat almaq Birləşmiş Millətlər Təşkilatının Rusiya tərəfindən dəstəklənən və təcrid olunmuş ölkə ilə bütün silah ticarətini qadağan edən qətnamələrinin pozulması olacaq. Lakin indi həmin özünün imzaladağı qətnamənin bir parçası olan Rusiya, digər təcrid olunmuş ölkələrlə əməkdaşlığı sərbəstləşmiş oldu. Qısacası ölkənin itirəcəyi bir şey yoxdur.
Moskva və Pxenyan isə bu məsələdə razılığa gəlsələr də , Şimali Koreya Rusiyaya hərbi yardım göstərməkdə problem çəkəcək. Ona görə ki, iki ölkə arasında mövcud olan logistika problemi bunu deməyə əsas verir.
Ələxsus iki ölkə arasındakı əlaqələrə ehtiyac var idi. KXDR pandemiyadan sonra enerji, ərzaq və malların təmini baxımından çox əziyyət çəkir. Çox məhdud səviyyədə fəaliyyət göstərə bilirlər.
Nəticə etibarı ilə bu hadisə geosiyasi arenada nə cür hadisələrlə yadda qalacaq onu bilmirik, lakin iki ölkə Qərbə və onun sanksiyalarına qarşı mübarizədən sağ çıxa bilmək üçün fəaliyyətlərini genişləndirməlidirlər.
Əkbər Novruz
