İyunun 2-4-də keçiriləcək Bakı Enerji Həftəsi çərçivəsində 30-cu Xəzər Neft və Qaz Sərgisi Azərbaycanı yenidən beynəlxalq enerji gündəminin mərkəzinə gətirəcək. Bu tədbir həm də Azərbaycanın regional enerji layihələrindəki rolunu və peşəkar potensialını nümayiş etdirmək üçün mühüm platformadır.

 “EDnews” xəbər verir ki ,  bu il sərgidə maraqlı iştirakçılardan biri də “TP Engineering” olacaq. Xaricdə formalaşmış bu Azərbaycan şirkəti 2014-cü ildən fəaliyyətə başlayaraq Rusiya, Rumıniya və Bolqarıstan kimi bazarlarda mühüm layihələr həyata keçirib. Şirkət neft-qaz sahəsində beynəlxalq EPCM-podratçı kimi tanınıb, əsas üstünlüyü isə ekoloji və texnoloji həllər təklif etməsidir.

“TP Engineering”in Azərbaycana qayıdışı ölkədə enerji layihələrinin artması ilə üst-üstə düşür. Yerli köklərə sahib beynəlxalq təcrübəli şirkət kimi bu dönüş yeni imkanların açarı ola bilər. Şirkət, gəlirlərini əsasən xaricdən əldə etsə də, mərkəzini Bakıda saxlayır ki, bu da ölkə iqtisadiyyatına töhfə deməkdir.

Bununla yanaşı, TP Engineering insan kapitalının inkişafına da önəm verir. Rusiyada uğurla tətbiq olunan peşə hazırlığı proqramları Azərbaycanda da həyata keçirilə bilər və ölkədən kənara ixtisaslı işçi ixracını təşviq edə bilər.

Hazırda Azərbaycanda xaricdə formalaşmış şirkətlərin daxili bazara dönüşü nadir haldır. TP Engineering-in fəaliyyəti bu sahədə test rolunu oynaya bilər. Əsas məsələ isə belə şirkətlərin yerli layihələrdə iştirak etməsi üçün uyğun şəraitin yaradılıb-yaradılmayacağıdır.

TP Engineering-in iştirakı Bakı Enerji Həftəsini təkcə beynəlxalq tədbir deyil, həm də ölkənin insan və texnoloji potensialını tanıyıb dəstəklədiyini göstərən mühüm platformaya çevirə bilər.

Fatimə Mərdanlı // EDnews