Xaricdə təhsil alan yəmənli tələbələr çoxunun adlarının hökumətin verdiyi təqaüd siyahısından silindikdən sonra ağır vəziyyətlə üzləşmişlər; bu ilin dördüncü rübündə xaricdə təhsil alan yəmənli tələbələrin təqaüdləri gecikir.
Sənada Husilərin nəzarəti altında olan Ali Təhsil Nazirliyi bu ilin üçüncü rübündən başlayaraq xaricdə təhsil alan yüzlərlə yəmənli tələbənin adını təqaüd alanların siyahısından silmişdir. Mərkəzi Bank bu ilin sentyabr-oktyabr aylarında Sənadan Ədənə köçürüldükdən sonra tələbələr üçün nəzərdə tutulmuş ödənişlər dayandırıldı və bu ilin dördüncü rübündən təqaüdlər artıq verilmir.
Rusiyada təhsil alan Yəmənli Tələbələr Birliyinin sədri Rədvan əl-Mas bildirir ki, RF-də 317 yəmənli tələbə bu ilin üçüncü rübü üçün nəzərdə tutulan təqaüdləri ala bilməmişlər, dördüncü rübün təqaüdləri isə hələ verilməyib.
Rədvan əl-Mas həmçinin bildirir ki, tələbələr üçün nəzərdə tutulan ödənişlərin dayandırılması özbaşınalıqdır, Yəmən səfirliyinin mədəniyyət məsələləri üzrə attaşesi Ali Təhsil Nazirliyinə təqaüd almadığına görə, təhsilini dayandıran tələbələrin siyahısını deyil, ödənişlərin vaxtında həyata keçirilməsi barədə tələb göndərmişdir.
Malaziyada təhsil alan yəmənli tələbələr birliyinin sədri Yusif əl-Şirai də bildirir ki, bu ilin üçüncü rübündən başlayaraq 75 tələbənin maddi ödənişləri haqsız olaraq dayandırılmışdır. Həmçinin deyir ki, 252 tələbə təhsilini bitirdikdən sonra Yəmənə qayıtmaq üçün təyyarəyə bilet ala bilmirlər.
Yusif əl-Şirai daha sonra deyir ki, Malaziyaya təhsil almağa göndərilmiş bütün tələbələr üçüncü və dördüncü rüblərin təqaüdlərini ala bilmirlər, yarım ildən bəri təqaüd almadan təhsillərini davam etdirərək, yaşadıqları mənzillərin kirayə haqqını ödəyə bilmədən çox ağır bir şəraitdə yaşayırlar. Malaziyada təhsil alan yəmənli tələbələrin ümumi sayı 610-a çatır. Bütün tələbələr təqaüd problemi ilə üzləşirlər və hökumətdən tezliklə onların və o cümlədən, adları siyahıdan çıxarılanların da bu ilin üçüncü rübü üçün nəzərdə tutulmuş maddi ödənişlərinin həyata keçirilməsini, təhsilini bitirmiş 252 tələbənin səfər xərclərinin və vətənə qayıda bilməsinin təmin edilməsini tələb edirlər.
Türkiyədə təhsil alan yəmənli tələbələr birliyinin sədri Məhəmməd əl-Qəbbani bildirir ki, Sənada hökümət dairələri dövlət hesabına təhsil alan ümumilikdə, 257 tələbədən 50-sinin bu ilin üçüncü rübü üçün təqaüdlərini dayandırmış, əlavə olaraq dördüncü rüb üçün nəzərdə tutulan bütün ödənişləri hələ ki, həyata keçirməmişlər. Bu da onların yaşayış və təhsilinə çox pis təsir edir.
Misirdə təhsil alan yəmənli tələbə Əli əl-Bəttah bildirir ki, Sənada hakimiyyət orqanları üçüncü rübdə 83 tələbənin təqaüdünü haqsız olaraq kəsmişlər. İcarə haqlarını ödəyə bilmədiklərinə görə çoxları mənzillərdən qovulmuşlar, ödənişlərin dayandırılması tələbələrin təhsil və məişət şəraitini çox ağırlaşdırmışdır.
Əli əl-Bəttah hökuməti üçüncü rüb üçün nəzərdə tutulan ödənişləri tezliklə həyata keçirməyə və dördüncü rübün bütün ödənişlərini gecikdirməməyə çağırıb.
Hüsam əl-Xərbaş
