İran prezidenti Həsən Ruhani Ermənistana səfər edəcək. İran Prezident Administrasiyasının mətbuat xidmətinin rəhbəri Pərviz İsmaili deyib ki, H.Ruhani Yerevana əlaqələrin dərinləşməsi və gücləndirilməsi məqsədi ilə dekabrın 21-də gedəcək. Məsələnin aktuallığını nəzərə alaraq, “Eurasia Diary” Milli Məclisin üzvü Asim Mollazadədən özəl açıqlamalar alıb.
Deputat bildirib ki, İran dövlət başçıları və hökümət rəsmiləri dost və qardaş hesab etdikləri Ermənistana mütəmadi səfər edirlər: “İran parlamentinin deputatı Ermənistanda etdiyi çıxışında "Ermənistan və İran bir millət, iki dövlətdir" ifadəsini işlətmişdi. İran bu gün Ermənistana dəstək verən ölkədir. Rusiyadan daha çox İran iqtisadi və enerji cəhətdən Ermənistana dəstək verir. Həsən Ruhaninin Ermənistana səfəri ənənəvidir və iki ölkə arasında olan yüksək əlaqələrin təzahürüdür.”
İsrail baş nazirinin Azərbaycana səfərinin fonunda Ruhaninin Ermənistana səfərini şərh edən həmsöhbətimiz bildirdi ki, Netanyahunun Bakı səfəri İranı çox narahat edir: “Azərbaycanın İsrail ilə hərbi sənaye və təhlükəsizlik sahələrində əməkdaşlığı var. Azərbaycan silahlı qüvvələrinin İsrail tərəfindən yeni silahlarla təmin edilməsi İranı təşvişə salır. Çünki, İran öz qardaşı olan Ermənistan üçün narahatdır” - deyə, Milli Məclisin üzvü vurğulayıb.
A. Mollazadə İran tərəfindən səslənən “müsəlman qardaşlığı”, “Fələstin problemi” kimi bəyanatlara münasibət bildirərkən qeyd edib ki, İranın müsəlman qardaşlığı olsa idi, onda İran Ermənistanın işğalı nəticəsində illərdir didərgin düşmüş Azərbaycan müsəlmanlarını nəzərə alardı: “İsrail baş nazirinin Azərbaycana səfəri Fələstini narahat etmir, ancaq İran rəsmilərini narahat edir. Çünki onlar Ermənistanı öz qardaşı hesab edirlər.”
Xatırladaq ki, bir günlük səfər zamanı H.Ruhani ermənistanlı həmkarı ilə görüşəcək və ikitərəfli əlaqələrin inkişafına dair danışıqlar aparacaq. Eləcədə səfər çərçivəsində iki ölkə arasında bir neçə əməkdaşlıq sənədi imzalanacaq. İki ölkənin iş adamlarının iştirakı ilə biznes forum keçiriləcək.
TALEH QULİYEV
