Günəş hələ görünməmişdən, üfüqdə qızartı ilə sarımtıl boyaların cilvəsi başlayar. Bu “boyalar qurultayı”, sanki bir kamil rəssamın möhtəşəm əsəri kimi Xəzər sularında əks olunub, rəqs edər. Elə bil, həyat bir anlıq nəfəsini tutub bu möhtəşəmmi möhtəşəm mənzərəni izləyir.
Çox keçmir, Günəş öz sükutlu amma şahanə təntənəsi ilə görünməyə başlayır – elə bil, Göy üzündə deyil, Xəzərin bağrından doğur... Onun hər şüası sanki bir söz söyləyir, ismarıc verir, çağırış edir: “Yeni gün başlayır… Bu anın qiymətini bil”!..
Səhərin bu gizəmli dəqiqələrində Xəzərin qıyısına çəkilmiş dalğaların pıçıltısını eşidirəm sanki... Onlar bir sirr bölüşür kimi gəlir mənə. Dalğaların pıçıltılarında həyatın dərin fəlsəfəsi var - bəli, bəli, elədir: əslində, hər son, bir başlanğıcdır. Gün başlayır, həftə başlayır, demək nələrsə də sona çatıb…
Göy üzü yavaş-yavaş maviyə bürünərkən, ətraf aləm də, üç bir-beş bir yuxudan ayılır. Quşlar, sanki bu möcüzəni qutlamaq və duyurmaq üçün bir-birinə səslənir. Ağacların təkəm seyrək yarpaqları səhər yelində astaca titrəyir – elə bil, Günəşə salama durur, onun işığını alqışlayırlar.
Bu təbii (canlı) mənzərənin tanığı olmaq, insana könül rahatlığı - rahatlıqdan daha üstün, daha zövqlü və təsirli bir duyğu bəxş edər. Bu, təkcə təbiətin özünü deyil, insan ruhunu da yeniləyən, ona ümid və həyat eşqi aşılayan bir möcüzədir. Biz möcüzələri uzaq keçmişdə baş vermiş hadisələr kimi alqılamış ola bilərik, amma məgər hər gün möcüzələr baş verir və biz onlara vərdiş etmişik… Günəşin doğuşu insana, insanlığa göstərir ki, hər qarışıqlıqdan sonra illa bir aydınlıq, hər qaranlıqdan sonra işıq var illa!..
Gün doğuşu, hələ-hələ Xəzərin bağrından qopurmuş kimi şahlanış… yalnız bir təbiət hadisəsi deyil. - Bu, ruhu dindirən, insanı həyata bağlanmaq, daha çox sevmək, daha çox yaratmaq üçün ilham verən ilahi bir çağırışdır. Bu möcüzəni hər gün yenidən görə bilmək və onun mahiyyətini anlamaq könül ucalığı, qəlb fərəhi, ürək işidir. - Əgər sevgi ilə yaşamağı bacarsaq, həyat necə də gözəldir...
Səhər bir başlanğıcdır. O, hər şeyin mümkün olduğunu, yenidən başlamaq üçün heç vaxt gec olmadığını xatırladır, xatırladır... İnsan da, insanlıq da Gün kimi yenidən doğmağı, həyatın sonsuz axışında öz nurunu saçmağı öyrənməli, öyrətməlidir.
