Keçən həftə Suriyanın Şimal şərqində yerləşən əl-Hasak bölgəsinin Rmelan yaşayış məntəqəsində Rusiya qüvvələrinin kalonu ilə ABŞ qoşunları üz-üzə gəlib.

Lakin insident Rusiya qüvvələrinin öz bazalarına geri çəkilməsi ilə atəşsiz başa çatıb. Bu hadisə "Sülh çeşməsi" əməliyyatından sonra ABŞ Prezidenti Donald Trampın siyasətindəki dəyişiklik edərək Suriyada neft quyularının mühafizəsi üçün öz qoşunlarını səfərbər etməsi üzərində kəskin gərginliyə səbəb olub.

“Rusların bu bölgəyə gəlməsinə icazə verməyəcəyik, gəlsələr, geri qayıtmalarını tələb edəcəyik”, – Şimali İraq Kürdüstanının başçısı Məsud Bərzaniyə yaxınlığı ilə tanınan “Rudaw” müxbirinin suallarını cavablandıran Amerika qoşunları komandiri deyib.

“Rudaw” müxbirinin “Lazım gələrsə, onlara qarşı güc tətbiq edərsinizmi” sualına ABŞ komandiri belə cavab verib: “Belə bir vəziyyətdə rəhbərlərimlə danışmalıyam. Güc tətbiqi məsələsi koalisiya tərəfindən veriləcək bir qərardır”.

Beləliklə, ABŞ əsgərləri bir həftə ərzində Rojavadakı neft yataqlarına çatmaq istəyən Rusiya hərbi karvanının yolunu üçüncü dəfə kəsmiş olub.

Strateji əhəmiyyətli M4 avtomobil yolu bir gün əvvəl ABŞ və Rusiya ordusu arasındakı münaqişə səbəbindən də müvəqqəti bağlanıb.

ABŞ-ın Suriyanın Raqqa və Deyrezor şəhərində əsas dayağı YPG-dən təşkil olunan Demokratik Suriya Qüvvələrinin (DSG) nəzarətində olan bölgələrdə 11 bazası və hərbi nöqtələri var.

Rus əsgərləri isə Qamışlı, Kobani və Münbicdə yerləşir.