Dekabrın 7-də Avropa İttifaqının maliyyə yardımı, UNICEF-in Azərbaycandakı nümayəndəliyinin və Azərbaycan Respublikasının Minatəmizləmə Agentliyinin (ANAMA) dəstəyi ilə Beynəlxalq Avrasiya Mətbuat Fondunun (BAMF) həyata keçirdiyi “Partlayıcı sursatların təhlükəsinə dair maarifləndirmə” (PSTM) layihəsi çərçivəsində UNICEF-in Azərbaycan Nümayəndəliyinin əməkdaşı Bəxtiyar Səlimovun və Avropa Birliyinin Ankara Nümayəndəliyinin əməkdaşı Begüm İmanın Tərtər rayonuna səfəri baş tutub. UNICEF və AB nümayəndələri Beynəlxalq Avrasiya Mətbuat Fondunun Tərtərdə fəaliyyət göstərən Peşə Təlim Mərkəzini ziyarət ediblər.
BAMF prezidenti Umud Mirzəyev təşkilat barədə məlumat verərək, layihə çərçivəsində görülən işlər, İcma Mina Aksiyası komandasının fəaliyyəti barədə danışıb. O, Peşə Təlim Mərkəzinin fəaliyyəti, PSTM layihəsinin əhəmiyyəti, layihənin nə qədər insanı əhatə etdiyi barədə söz açıb.
BAMF-ın ANAMA ilə birgə gördüyü işlərdən Səfər çərçivəsində təşkil olunan görüş zamanı vətəndaşlara “Partlayıcı sursatların təhlükəsinə dair maarifləndirmə” (PSTM) layihəsi, layihənin əhəmiyyəti, keçiriləcək tədbirlər və görüləcək işlərlə bağlı məlumatlar verilib. Bundan əlavə, Peşə Təlim Mərkəzində partlayıcı sursatların təhlükəsinə dair maarifləndirmə mövzusunda təlim keçirilib. Təlim nümayəndəliklərin əməkdaşları tərəfindən müşahidə edilib.
Daha sonra qaçqın və məcburi köçkünlərin məskunlaşdığı Şıxarx qəsəbəsinə baş çəkilib. Beynəlxalq Avrasiya Mətbuat Fondunun prezidenti Umud Mirzəyev, həmçinin nümayəndəliklərin əməkdaşları icma nümayəndələri ilə görüş keçiriblər. Eyni zamanda, layihənin əhəmiyyəti ilə bağlı vətəndaşların fikirləri öyrənilib, onların əlavə təklif və istəkləri qeydə alınıb. Görüşdə regional koordinatorlar Fariz Vəliyev və Vüqar Yusifli iştirak ediblər.
Səfər zamanı Tərtərin keçmiş təmas xətti olan Həsənqaya kəndində də görüşlər təşkil olunub. Burada yaşayan vətəndaşlarla söhbət edilib. Eyni zamanda yerli əhaliyə proqram haqqında ətraflı məlumat verilib, layihənin əhəmiyyəti və aktuallığı qeyd edilib, onların sualları cavablandırlıb.