Ukrayna ilə Rusiya müharibəsinin ikinci mərhələsindən bəri artıq Polşanın da müharibəyə qatılması ilə bağlı müəyyən fikirlər var idi. Bu gün Rusiyanın Ukraynaya atdığı raket Polşa ərazisinə düşüb, nəticədə bir neçə dinc sakinin həlak olması məsələni daha da ciddiləşdirib. 

Baş verən hadisə barədə Ednews-a danışan ukraynalı siyasi ekspert Vitali Yarmolenko bildirib ki, baş verənlərə həqiqətən də səssiz qalmaq mümkün deyil. 

“Rusiya böyük kaset tipli raket hücumu ilə Ukraynanın enerji infrastrukturunu məhv etməyə çalışırdı. Bu amansız hücumda Ukraynanın qərbindəki obyektlər, o cümlədən Polşa ilə sərhədə bitişik rayonlarda yerləşən yerlər də vurulub. 

Zərbənin Ukraynaya qonşu olan dövlətin sərhədinə endirilməsi heç də təsadüfi görünmür. Bundan başqa, atılan raket Ukrayna və Aİ arasında elektrik enerjisi mübadiləsini təmin edən elektrik xəttinin düz yanına düşüb. Beləliklə, ehtimallar daha çox bunun məqsədyönlü hədəf olduğunu göstərir. Eyni zamanda, haqlı olaraq iddia etmək olar ki, Rusiya belə bir hərəkətlə NATO-nun reaksiyasını sınamağa cəhd göstərir. Yəni bu cür təxribatçı həmlə ilə Rusiya Qərbin bir növ qırmızı xətlərini müəyyən etməyə çalışır”.

V.Yarmolenko həmçinin Polşanın bu addıma necə reaksiya verəcəyi barədə açıqlama verib. O, Polşanın bunun təxribatçı hücum olduğundan xəbərdar olduğunu və münaqişəyə qoşulmaq fikrində olmadığını deyib.   

“Polşa praqmatik davranmağı seçir. Vaşinqton müqaviləsinin 5-ci maddəsi belə tez müddətdə işə düşməsi hələki real deyil. Çünki, Polşa və NATO Rusiya təcavüzünün bu mərhələsi üçün açıq şəkildə Rusiyaya qarşı əks reaksiya verməyə hazır deyil. Baxmayaraq ki, Rusiyanın bu taktikası münaqişəni daha da alovlandıra bilər, lakin onlar vəziyyəti yumşaltmağa daha çox meylli görünür”. 

Ekspert Polşa və Qərbin bundan sonrakı raket hücumlarına qarşı dəstəyini vurğulayaraq, Ukraynanın qərbində Hava Hücumundan Müdafiə və anti-ballistik sistemlərin gücləndirilməsinə ehtiyacın olduğunu qeyd edib.  

Elnur Ənvəroğlu