Xəbər verdiyimiz kimi, qeyri-qanuni erməni silahlı dəstələrinin üzvləri sərhəddə yenidən təxribat törədərək ordumuzun Ağdam, Xocavənd, Füzuli və Kəlbəcər rayonları istiqamətlərində yerləşən mövqelərinin qarşısında uzunmüddətli fortifikasiya qurğularını quraşdırmağa cəhd göstəriblər. Həmçinin Ermənistan silahlı qüvvələrinin bölmələri İstisu, Basarkeçər rayonunun Göysu yaşayış məntəqələri istiqamətlərində yerləşən mövqelərindən Azərbaycan Ordusunun Kəlbəcər rayonunun İstisu, Gədəbəy rayonunun Qalakənd yaşayış məntəqələrində yerləşən mövqelərini müxtəlif çaplı atıcı silahlardan bir neçə dəfə atəşə tutub.
Məsələ ilə bağlı hərbi ekspert Ədalət Verdiyev Ednews-a açıqlamasında bildirib ki, Ermənistan ordusu həm sərhəddə, həm də rus sülhməramlıların yerləşdiyi müvəqqəti ərazilərdə son zamanlar intensiv şəkildə mövqelərimizi atəşə tutur.
“Həmçinin yeni mühəndis-istehkam qurğuları inşa edir. Bu da bir mənalı olaraq işğalçı ölkənin yenidən təxribat edəcəyinin göstəricisidir. Təxribatların vaxtında qarşısını almaq üçün adiyyatı güc strukturlarımız adekvat, aktiv, səmərəli tədbir görməlidir. Mövqelərimizin atəşə tutulduğu yerdə Azərbaycan bayrağının və əsgərinin yerləşdirilməsi gücümüzün göstəricisidir. Mühəndis-istehkam qurğularının dağıdılması bu vəziyyətdən çıxış yollarından biridir”.
Aysel Şahmar