İsrail-Həmas qarşıdurması 17-ci gününə qədəm qoyub. İsrail mümkün quru əməliyyatından əvvəl Qəzzada hava əməliyyatlarını gücləndirib. Bir gecədə 400-dən çox fələstinlinin həyatını itirdiyi bildirilib. İsrailin müdafiə naziri Qəzzaya quru hücumunun aylar çəkə biləcəyini deyib. Qəzzaya basqın zamanı bir İsrail əsgəri həlak olub. 

Ednews bölgədə son 24 saatda baş verənləri təqdim edir:

HƏMAS-ın 7 oktyabr “Əqsa tufanı” adı ilə İsrailə qarşı başlatdığı əməliyyatın ardından İsrailin Qəzzaya hücumları 17-ci gündür davam edir.

İsrailin müdafiə naziri Yoav Qalant Hərbi Hava Qüvvələri Əməliyyat Komandanlığının iclasında, "Qəzzada quru əməliyyatı orada son müharibə olmalıdır, çünki ondan sonra HƏMAS olmayacaq. Bu, 2-3 ay çəkə bilər, amma nəticədə orada Həmas olmayacaq”, deyə bildirib.

Hərtərəfli quru əməliyyatı gözlənildiyi halda, İsrail ordusu ara-sıra Qəzza sərhədinə girərək əməliyyatlar həyata keçirir.
Nəhayət, Həmas Xan Yunus bölgəsinə basqın edən İsrail əsgərlərinə cavab verib. 

Tank əleyhinə raketin atılması nəticəsində 1 İsrail əsgəri ölüb, 3-ü yaralanıb. HƏMAS bəyanat verdi ki, biz İsrailin hücumunu dəf etdik. 

İsrail ordusu mümkün quru əməliyyatından əvvəl Qəzzanı havadan bombardmanlarını gücləndirib.
İsrail təyyarələri Qəzzada Cəbəliyyə, Əl-Bureyc və Nusayrat qaçqın düşərgələrinə və Beyt Lahiya bölgəsində mülki əhalinin yaşadığı bir çox evə hava zərbələri endirib.

Hücumlar nəticəsində 400-dən çox fələstinlinin həyatını itirdiyi bildirilib.

Fələstinin rəsmi xəbər agentliyi olan WAFA-nın şəhərdəki tibbi mənbələrdən verdiyi məlumata görə, ölənlərin 70 faizi uşaqlar, qadınlar və qocalardır.

Yanacaq tankerləri 17 TIR-dan ibarət konvoyda ilk dəfə Qəzzaya çatıb.

Yardım karvanı Qəzzaya doğru hərəkət edərkən, Rəfah Sərhəd Qapısı yaxınlığında partlayış səsləri eşidilib.

İSRAİL MİSİR NÖQTƏSİNİ VURDU

İsrail ordusu Rafah Sərhəd Qapısına yaxın bir Misir hərbi məntəqəsini hədəfə alıb. Təl-Əviv hücumun səhvən həyata keçirildiyini açıqlayıb. Misir administrasiyası İsrailin onlarla əlaqə saxladığını və vəziyyəti izah etdiyini bildirib. Hücum nəticəsində Misir əsgərlərinin yüngül yaralandığı açıqlanıb. 

İsrail hava zərbələri ilə Qəzzadakı Cəbəliyə qaçqın düşərgəsini hədəf alıb. Hədəfdə iki məscid var idi. Hücum nəticəsində ən azı 2 fələstinli həyatını itirib, çoxlu sayda insan isə yaralanıb.

İsrail ordusu İordan çayının qərb sahilini də hədəfə alıb.

Cenin şəhərinə edilən hücumda Əl Ənsar məscidi İsrail döyüş təyyarələri tərəfindən vurulub.

Məscidi vurduğunu etiraf edən İsrail ordusu hədəflərinin ibadət yerinin altındakı tunellər olduğunu iddia edib.

Beləliklə, oktyabrın 7-dən İsrailin vurduğu məscidlərin sayı 31-ə yüksəlib.

İsrailin aviazərbələri zamanı Qəzzadakı Birləşmiş Millətlər Təşkilatının məktəbi də hədəfə alınıb.

İsrailin bombardmanlarından xilas olmaq üçün fələstinlilərin sığındığı Xan Yunisdəki məktəbdə çox sayda insan dağıntılar altında qalıb.

Digər tərəfdən, on minlərlə İsrail əsgəri Qəzza sərhədində quru əməliyyatını gözləməyə davam edir.
Bundan əvvəl İsrailin iqtisadiyyat naziri hökumətin orduya yaşıl işıq yandırdığını və əməliyyatla bağlı qərarın orduya aid olduğunu bildirmişdi.

İSRAİLƏ DƏSTƏK SƏFƏRLƏRİ

İsrailin baş naziri Benyamin Netanyahu Fransa prezidenti Makron və Hollandiyanın baş naziri Ruttenin İsrailə səfər edəcəyini açıqlayıb.

Rutte bu gün İsrailin paytaxtı Təl-Əvivə bir günlük səfər edəcək və Netanyahu ilə görüşəcək.

Rutte daha sonra Fələstin prezidenti Mahmud Abbasla görüşəcək.

Fransa prezidenti Emmanuel Makron da çərşənbə axşamı İsraildə olacaq.

Oğuz