Azərbaycanın işğaldan azad edilmiş ərazilərində minatəmizləmə prosesi sürətlə davam edir. Azərbaycan Ərazilərinin Minalardan Təmizlənməsi üzrə Milli Agentlik (ANAMA) may ayına dair aylıq hesabatını yayıb.

Hesabata əsasən, cəmi 7440,2 hektar ərazi mina və partlamamış hərbi sursatlardan (PHS) tamamilə təmizlənib. Əməliyyatlar nəticəsində:

154 tank əleyhinə mina,
321 piyada əleyhinə mina,
1991 partlamamış hərbi sursat (PHS) aşkar edilərək zərərsizləşdirilib.
Minatəmizləmə işləri ANAMA, Müdafiə Nazirliyi, Fövqəladə Hallar Nazirliyi, Dövlət Sərhəd Xidməti və 4 özəl şirkətin birgə səyi ilə həyata keçirilib.

Əməliyyatların coğrafiyası geniş olub – Tərtər, Ağdərə, Kəlbəcər, Ağdam, Xocalı, Xankəndi, Şuşa, Xocavənd, Laçın, Füzuli, Cəbrayıl, Qubadlı və digər bölgələri əhatə edib.

Bundan əlavə, Qazax rayonunun Ermənistanla sərhəddə yerləşən işğaldan azad edilmiş Ayrım, Aşağı Əskipara, Xeyrimli və Qızılhacılı kəndlərində də minatəmizləmə əməliyyatları aparılıb.

Bu fəaliyyətlər Azərbaycanın azad edilmiş torpaqlarında təhlükəsiz həyatın bərpası və məcburi köçkünlərin qayıdışı üçün mühüm zəmin yaradır. ANAMA və tərəfdaş qurumlar gələcək aylarda da təmizləmə işlərini davam etdirməyi planlaşdırır.

 Fatimə Şükürova // EDnews