BƏƏ-nin Bakıdakı səfirliyində azərbaycanlı tələbələrin ərəb dilinin tədrisi üzrə dərsdən kənar məşğuliyyətinə həsr olunmuş görüş keçirilib.
Eurasia Diary xəbər verir ki, tədbirdə Bakı Avrasiya Universiteti, Bakı Dövlət Universiteti, Azərbaycan Dillər Universiteti, Azərbaycan İlahiyyat İnstitutunun tələbələri və Beynəlxalq Avrasiya Mətbuat Fondunun ərəbşünas jurnalisti Həşim Məmmədov iştirak ediblər. Səfirliyin əməkdaşları Birləşmiş Ərəb Əmirliyini əks etdirən şəkillərdən ibarət sərgini nümayiş etdiriblər və sərgi barədə ətraflı məlumat veriblər. Daha sonra BƏƏ və onun istiqlaliyyəti haqqında video-çarx nümayiş olunub.
Tədbirin təşkilatçısı - Sultan STS Şirkətinin rəhbəri, Azərbaycan Dillər Universitetinin dosenti, tanınmış ərəbşünas Ülviyyə Hüseynova şirkətin fəaliyyəti barədə danışıb.
Görüş zamanı BƏƏ-nin Azərbaycandakı səfiri Məhəmməd Əhməd Hamil Əl-Qubaisi ərəb dilinin özəllikləri, onun tarixən yayılması, inkişaf dövrləri haqqında söz açıb və tələbələrin fikirləri öyrənilib. O həmçinin, BƏƏ və onun bir sıra şəhərlərindən söz açıb. Daha sonra tələbələr özləri haqqında məlumat verib. Tədbir tələbələrin ərəb dilində şerlər söyləyib və mahnılar oxuyaraq öz bacarıqlarını nümayiş etdirməsilə davam edib. BƏƏ səfiri azərbaycanlı tələbələrin ərəb dilinə olan marağını yüksək qiymətləndirib. Görüşün sonunda Ülviyyə Hüseynova cənab səfirə Sultan STS şirkətinin adından xatirə hədiyyəsini və Sultan Ərəşünaslar klubunun fəxri üzvlük kartını təqdim etmişdir.Qeyd edək ki artıq Cənab səfir də Sultan Ərəbşünaslar klubunun fəxri üzvüdür.
Qeyd edək ki, Ərəb ölkələrinin Azərbaycanda təmsil olunan səfirliklərində çay süfrəsini ilk dəfə olaraq Sultan STS Şirkəti təşkil etmiş və bu ənənəni indi də davam etdirməkdədir.
