Mədəniyyət: Suk Ukaz-13 festivalı çərçivəsində “ Orta Asiyada Ərəb dili” mövzusunda simpozium keçirilmişdir
Taif. 27 Zilhiccə 1440h. 28 Avqust 2019m. Səudiyyə Xəbər Agentliyi
Orta Asiyanın dörd dövlətindən olan elm xadimləri öz ölkələrində Ərəb dilinin getdikcə geniş yayılması və onun öyrənilməsinə tələbatın günü-gündən artması barədə danışdılar. Bunun da başlıca səbəbi bu ölkələrin İslam dini ilə bağlılığıdır.
Bu fikirlər bu günlərdə Taif Universitetinin təşkilatçılığı ilə hicri 1440-cı il Suk Ukaz-13 festivalı çərçivəsində keçirilən və Kral Abdulla ben Əbdüləziz adına Beynəlxalq Ərəb dilinə xidmət mərkəzinin direktoru Doktor Abdulla əl-Vəşminin idarə etdiyi “ Orta Asiyada Ərəb dili” mövzusunda simpozium zamanı səslənmişdir.Simpoziumda Səudiyyə Ərəbistanının nüfuzlu xəbər portalları:aleqt.com,royatwatan.com,alweeam.com.sa və spa.gov.sa iştirak etmiş ve geniş şəkildə işıqlandırmışlar.
Doktor Dina Asincan Ərəb dilinin elmi və mədəni əlaqələrdə bir vasitə olduğunu qeyd edərək demişdir ki, o, əzbərlədiyi 6 müəlləqə (cahiliyyə dövrü ərəb poeziyasında janr-Z.Q.) sayəsində Ukazın mahiyyətini dərk edə bilmişdir.
O həmçinin demişdir ki, Qazaxıstanda Ərəb dili barədə danışanda deməliyik ki, bizim cəmiyyətdə onun öyrənilməsinə olan tələbat bir-neçə səbəbdən irəli gəlir, bunlardan ən önəmlisi onun Qurani Kərimin dili olmasıdır, dünyanı vahid bir rəqəmsal məkana çevirən “qloballaşma” dövründə mədəniyyət və maarif dilidir. Bu həm də Ərəb dilinin tədrisinin önəmini artırır, xüsusilə, dil insanların başqa ölkələrə səyahəti zamanı onlara yardımçı olur.
Məşhur Azərbaycanlı ərəbşünas Doktor Ülviyyə Hüseynova qeyd etdi ki, son zamanlar Azərbaycanda əhalinin Ərəb dilinin öyrənilməsinə təlabatının artması müşahidə edilir. Ülviyyə xanım Azərbaycanda bu dilin tədrisi tarixinin ölkənin İslam mədəniyyətinə qovuşması , Ərəb dilinin istifadə dairəsinə daxil olması, bu prosesin cəmiyyətin bir çox sosial, iqtisadi, fikri və mədəni sahələrini əhatə etməsi ilə başlandığını bildirərək, demişdir: “Ərəb dilinin tədrisi kurslarının təşkili sayəsində səylərimizi artırırıq”. O həm də qeyd etdi ki, İslam amili orta əsrlər dövründə Azərbaycanda önəmli tarixi rol oynamışdır, Ərəb dili geniş bir ərazidə ünsiyyət vasitəsi olmuş, elm adamları bu dillə bağlı tərcümə işlərində iştirakla onun təşviqinə yardımçı olmuşlar.
Doktor Əskər Salamov da qeyd etdi ki, Ərəb dili bütün dünyada yayılmışdir, başqa dünya dillərilə yanaşı öz səviyyəsi, inkişafı və əhatəliyi ilə seçilir. Onun fikrincə, Ərəb dilinin dünyada geniş şəkildə yayılmasına və onun inkişaf səviyyəsinə ən bariz dəlil ərəb olmayan ərəbşünas elm adamlarından ibarət nümayəndə heyətlərinin öz ölkərəində Ərəb dilinin yeri barədə söhbət açmasıdır. O həmçinin bildirdi ki, Tacik xalqı Ərəb dilini böyük həvəslə öyrənir, xüsusilə qeyd etdi ki, Tacik dilində işlədilən sözlərin 40%-ə qədəri Ərəb dilindən alınmışdır.
Doktor Əbdültahir Qəlbəyev Qırğızıstan Respublasında tələbələr üçün nəzərdə tutulan tədris proqramlarında Ərəb dilinin geniş təmsil olunmasından danışıb bildirdi ki, bu proqramlar ali təhsil, ixtisas artırma , könüllü tədris, praktik tətbiq, əxlaqi tərbiyyə və riyazi əyləncə səviyyələrini əhatə edir, bundan əlavə Ərəb dili ilə bağlı müsabiqələr və təntənəli tədbirlər də həyata keçirilir.
Əbdültahir Qəlbəyev həmçinin bildirdi ki, son beş il ərzində ərəb ölkələrindən Qırğızıstan Respublikasına gələn turistlərin sayında böyük artım nəzərə çarpır. Respublikanın Mədəniyyət, İnformasiya və Turizm Nazirliyinin verdiyi məlumatlara əsasən demək olar ki, 2018-ci ildə ərəb ölkələrindən gələn turistlərin sayı təqribən 8 min nəfər olmuşdur.
Əbdültahir Qəlbəyev simpoziumun sonunda bir daha vurğuladı ki, ərəb turistlərinin sayında bu artım Qırğızıstanda ərəb dilinə olan marağın artmasına səbəb olur, belə ki iri şəhərlərdə fəaliyyət göstərən Ərəb dilinin tədrisi kursları onu öyrənmək istəyənlərlə doludur.
