Dünya musiqi tarixinin nadir incilərindən olan və İkinci Dünya müharibəsinin xaosu zamanı oğurlanan əfsanəvi skripka - dahi ustad Antonio Stradivarinin əsəri Tokioda tapılıb. Alətin yoxa çıxmasından təxminən 80 il sonra onun izinə Yaponiyada rast gəlinib.

“EDnews” xəbər verir ki, bu barədə "The New York Times" məlumat yayıb.

Sözügedən mədəni irsi tapmaq mütəxəssis Karla Şapronun səyləri nəticəsində mümkün olub. O bu hadisədə, demək olar ki, detektiv məharəti nümayiş etdirərək unikal musiqi alətini tanıyıb.

Tanınmış yəhudi ailəsi Mendelson-Bonkeyə məxsus olan skripka italyan ustad tərəfindən 1709-cu ildə hazırlanıb.

Məşhur bəstəkar Feliks Mendelsonla qohumluq əlaqələrinə malik olan ailə skripkanı nəsildən-nəslə ötürərək qoruyurdu. Alət müharibə illərində yoxa çıxdıqdan sonra ailə üzvləri onu illərlə axtarsalar da, tapmayıblar.

Gözlənilməz kəşf Şapronun 2018-ci ildə Yaponiyada keçirilən Stradivari alətləri sərgisinin fotolarını təhlil etməsi nəticəsində baş verib. Sərgidə "Stella" adlı və 1707-ci ildə hazırlandığı iddia olunan skripka nümayiş olunub. Lakin Şapro bu alətin bəzi özünəməxsus xüsusiyyətlərini görüb onun düzgün identifikasiya olunmadığını sezib.

Aparılan dəqiq araşdırma - taxta strukturu, lak və quruluşun unikal xüsusiyyətlərinin təhlili nəticəsində Şapro bu skripkanın əslində Mendelson skripkası olduğunu sübut edib. Görünür, müharibədən sonrakı qarışıqlıq zamanı bir neçə Stradivari alətinin adları səhv salınıb və bu qiymətli alət illər boyunca yanlış ad altında sərgilənib.

Qeyd edək ki, 2021-ci ilə olan məlumata görə, dünyada Antonio Stradivari tərəfindən hazırlanmış təxminən 650 musiqi aləti, o cümlədən 450 skripka qorunub saxlanılır.