“Fransada “Xarıbülbül” festivalı heç işıqlandırılmadı, bir kəlmə belə olsun yazılmadı. Bu da əsassız deyil, hər kəs bilir ki, Fransada əsas media, mətbuat erməni mənşəli fransızların əlindədir. Fransa Prezidenti də bu günlərdə özünəməxsus ermənipərəst münasibətini bildirib və hər dəfə imkan yaranan kimi, eyni mövqe nümayiş etdirir”.
Bu sözləri uzun müddətdir ki, Fransada yaşayan, əslən Şuşadan olan tanınmış azərbaycanlı musiqiçi Təranə Monbarbüt Moderator.az saytına açıqlamasında bildirib.
Qeyd edək ki, Təranə Monbarbüt Fransada yaşadığı müddətdə orada “Şuşanın dağları” adı altında konsert proqramları təşkil edib. O, 30 il ərzində mütəmadi olaraq Fransa mətbuatında Azərbaycan həqiqətləri, Şuşanın işğalı ilə bağlı açıqlamalar verir, təbliğ işi aparır. Musiqiçi Şuşaya olan məhəbbətindən iki qızlarına Şuşa adını ləqəb kimi götürüb.
Təranə Monbarbüt 12-13 may tarixlərində Şuşada keçirilən “Xarıbülbül” festivalının görüntülərindən təsirləndiyini də dilə gətirib:
“Şuşada, Cıdır düzündə keçirilən “Xarıbülbül” festivalından görüntüləri izlədim. Təəssüratlarımı sözlə ifa etmək çox çətindir, inanılmaz hisslər keçirdim! Şuşanın işğaldan azad olunduğu 8 noyabr tarixindən bəri yeganə arzum Şuşaya, evimə qayıtmaqdır. Azərbaycanın misilsiz musiqisinin sədaları altında Cıdır düzünün görüntüləri elə bil bir möcüzə idi. Bu mənzərə mənə çox təbii gəldi. Elə bil bir tapmacanı həll etmiş oldum, yuxudan ayıldım və hər şey uşaqlığımdakı kimi idi - Cıdır düzündə yaz, göy səma, musiqi... Beləliklə, təəssüratlarım həm kövrək, həm də xoşbəxtlik hissləridir. Biz bu qələbəni, sevinci müzəffər ordumuzun, Ali Baş Komandanımızın, qazilərimizin sayəsində əldə etdik. Şəhidlərimizin ruhu şad olsun, onların xatirələri Azərbaycan var ikən əbədi yaşayacaq”.