Azərbaycan Mətbuat Şurası 22 iyul Milli mətbuat və jurnalistika günü münasibətilə Azərbaycan mətbuatının banisi, islam dünyasının ilk təbiətşünas alimi Həsən bəy Zərdabinin yad edilməsilə bağlı bir sıra tədbirlər reallaşdıracaq.
Mətbuat Şurasından “Eurasia Diary”ə verilən məlumata əsasən, Milli Mətbuat Günü ilə əlaqədar Mərkəzi Nəbatat bağındakı Həsən bəy Zərdabinin büstünün təmiri və bağın girişində qoyulması üçün Mərkəzi Nəbatat bağının və Botanika İnstitutunun rəhbərliyilə danışıqlar aparılması planlaşdırılır.
Mətbuat Şurasının rəhbəri Əflatun Amaşovun göstərişi ilə Azərbaycan Mətbuat Şurasının sədr müavini Umud Mirzəyev Mərkəzi Nəbatat bağında olub. Həsən bəy Zərdabinin büstünü ziyarət edib.
O bildirib ki, büstün təmirə ehtiyacı var və büstün ətrafında müəyyən abadlıq işlərinin aparılması məsləhətlidir.
U.Mirzəyev qeyd edib ki, büstün təmiri və yerinin dəyişdirilməsi ilə bağlı Mərkəzi Nəbatat bağının rəhbərliyi ilə danışıqlar aparıb və onlar da bu fikirlə həmrəydirlər.
Mətbuat Şurası büstün gələcəkdə bağın girişinə qoyulması ilə əlaqədar təkliflər verəcək. Mərkəzi Nəbatat bağının Həsən bəy Zərdabinin Azərbaycan təbiət elminə verdiyi töhvələrə görə, adının daşıması ilə bağlı müzakirələr aparacaq.
Umud Mirzəyev qeyd edir ki, Nəbatat bağına gələn hər bir ziyarətçinin mətbuatın banisi və islam dünyasının ilk təbiətşünas alimi haqqında məlumatlı olmağı önəmlidir: “Büstün bağın hər kəs üçün görünən hissəsində - girişdə qoyulması ziyarətçiləri daha çox məlumatlandıracaq”.
Qeyd edək ki, Milli Mətbuat Günü ilə əlaqədar Mətbuat Şurasının üzvləri, media təmsilçiləri Fəxri xiyabanda Həsən bəy Zərdabinin məzarını, daha sonra Mərkəzi Nəbatat bağı və Botanika İnstitutunda qoyulmuş büstünü ziyarət edəcəklər.
Xatırladaq ki, Mərkəzi Nəbatat Bağı və Botanika İnstitutu 1934-cü ilin iyul ayının 3-də yaradılıb. Hazırda bağda ciddi su problemi var. Bu da bağın ərazisində flora tərkibinin saxlanılmasında çətinliklər yaradır.
.jpeg)