Azərbaycan Yazıçılar Birliyinin (AYB) XIII qurultayına sayılı günlər qalır. Hazırkı sədr Xalq yazıçısı Anardır. Qurultayda dəyişikliklər olacaqmı? Yeni sədr gözlənilirmi?
Ednews bu barədə tanınmış yazıçıların münasibətini öyrənib. Cavabları təqdim edirik:
Xalq şairi Sabir Rüstəmxanlı qurultayla bağlı qısa və lakonik danışıb:
“Qurultaydan ciddi bir gözləntim yoxdur. Anar sədirliyində qalacaq”.
Yazıçı Səfər Alışarlı fikirində bildirdi ki, yazıçıların qurultayı ölkə həyatının ən müxtəlif sahələrinə aid məsələləri müzakirə edə bilər.
“Yazıçılıq mənəviyyat məsələsidir. AYB isə yaradıcılıq təşkilatının idarəçilik formasıdır. Bu idarəçiliyin sovetdənqalma ənənələri var, zənnimcə, onlar son 30 ildə daha da möhkəmlənib.
Qurultay yəqin ki, həmişəki tək hesabat xarakterli olacaq. Bütün təşkilati məsələlər qurultaya qədər həll olunacaq. Nə yenilik olacağını bilmirəm”.
Yazıçı Elçin Hüseynbəyli qeyd etdi ki, qurultaya hazırlıq işi başa çatıb. Qurultayöncəsi on bir məruzə dinlənilib, müzakirə olunub.
“Seksiyalar və bölmələr iclaslarını keçirib, seçimlərini ediblər. Qurultaya nümayəndələrin və qonaqların siyahısı müəyyən edilib. Qurultayöncəsi məruzələr kitab şəklində çıxıb. Qurultayın vaxtı dəyişdirilə bilər. Amma mütləq bu lin sonuna kimi keçiriləcək. Sədr qurultayda seçilir. Şəxsən mənim seçimim müəyyəndir. Mən Anar müəllimin namizədliyini dəstəkləyəcəm”.
Yazıçı Varis qurultayla bağlı yalnız bir cümlə ilə fikrini dedi:
“Düşünürəm ki, sədr Anar müəllim olacaq.
Yazıçı Alpay Azər düşünür ki, əgər səsvermə ənənəvi olaraq açıq keçirilsə, onda Anar müəllim sədr seçiləcək:
“Səsvermə gizli keçirilsə, onda ən azından, sədrlik uğrunda müəyyən qədər mübarizə gedəcək. Düzdür, AYB üzvü deyiləm, amma demokratik prosedur naminə gizli səsvermənin keçirilməsini tövsiyə edərdim”.
Şair Rəbiqə Nazimqızı da qurultayla bağlı qısa münasibət bildirdi:
“Qurumun üzvü deyiləm, AYB-də nə baş verdiyi ilə maraqlanmıram. Düşünürəm ki, böyük mənada qurultay da, yeni sədr seçkiləri də - kimin seçilməsindən asılı olmayaraq - ədəbiyyatımız və ölkəmiz üçün heç nəyi dəyişməyəcək”.
Sorğunu keçirdi: Oğuz Ayvaz