Xəbər verdiyimiz kimi, Xalq yazıçısı Anar növbəti dəfə Azərbaycan Yazıçılar Birliyinin (AYB) sədri seçilib.
Qurultay sonrası mediada, sosial şəbəkələrdə AYB-yə kəskin tənqidlər, etirazlar səngimək bilmir.
Ednews məsələ ilə bağlı AYB üzvü, tanınmış yazıçı, şairlərin münasibətini öyrənib.
“Ulduz” jurnalının baş redaktoru, şair Qulu Ağsəs bildirdi ki, AYB-nin hər dəfə Qurultayı olanda ajiotaj yaranır.
“Hər dəfə də eyni şeyə təəssüflənirəm. Bəstəkarların, rəssamların, fotoqrafların da qurultayları olur. Onların nə qurultay ərəfəsində, nə də qurultay sonrası məsələləri heç bir ajiotaj doğurmur. Nəyə görə yaradıcı təşkilatların arasında məhz AYB səs-küyə səbəb olur?! Mən bunun cavabını bilmirəm. Səbəbi hələ də Azərbaycan insanının rəssamdan, bəstəkardan çox yazıçıya olan marağıdır. Cəmiyyətin marağı yazıçının şəxsinədir. Əgər yazıçının yaradıcılığına maraq olsaydı, onda bizim kitablarımız az tirajla çıxmazdı. Kədərli hal, həm də odur ki, ədəbiyyat ətrafı söhbətlərə maraq daha böyükdür. Sırf ədəbiyyata maraq isə çox azdır. Qurultaydan sonra hansısa əsərin, pyesin, şeirin, romanın, hekayənin, essenin ətrfadında polemika aparmırıq. Biz sırf ədəbiyyat ətrafı söhbətlər aparırıq. Ədəbiyyatın boynubükük, yetim, yiyəsiz qalıb kənarda. Heç onun halını soruşan da yoxdu”.
Q.Ağsəs üç-beş günə bu söz-söhbətlərin bitəcəyini və arzusunu dilə gətirdi:
“Ümid etmək istəyirəm ki, adamlar ədəbiyyatın özü ilə maraqlanacaqlar. Onlar mətnlə, şeirlə maraqlanacaq. Bu polemikalar çox istərdim ki, hansısa ədəbi nümunənin üzərində qurulsun. Vaxtı ilə İsa Hüseynovun əsərləri ətrafında böyük polemikalar gedirdi. İndi o polemikalar yoxdur. İsa Hüseynov yaşasaydı indi onun əsərlərindən yox, şəxsindən polemika aparardılar. Arzu edirəm ki, ədəbiyyat nümumələrindən, əsərlərindən polimikalar qurulsun”.
Yazıçı Elçin Hüseynbəyli qeyd etdi ki, AYB-yə sədr olmaq üçün peşəkarlıq, nüfuz, humanizm, ədalət və təmkin kimi keyfiyyətlərdən keçir.
“Bütün bunlar Anarda var. Ürəyindən namizədlik keçən məşhur yazarlarımız bunu çox gözəl bilir. AYB üzvlərinin nazı ilə oynamağa çoxlarının hövsələsi çatmaz. Mən ilin əvvəlindən qurultaya hazırlığın kuratoru olmuşam və bunu yaxşı bilirəm”.
E.Hüseynbəyli söhbət əsnasında AYB-yə ayrılan puldan da danışdı:
“AYB-yə niyə pul ayırdılar deyənlər isə, inciməyin, qul psixologiyasının daşıyıcılarıdır. Hələ onu demirəm ki, kimlərsə belə kritik bir məqamda dövlətlə yazıçıların arasına girməyə uğursuz cəhdlər edir. Savaş hələ bitməyib”.
Yazıçı sədirliyə namizəd gənc yazarlardan da bəhs etdi.
“Qurulataya namizədəm, deyə sosial şəbəkədə özünü didib-dağıdan bu gənclərin kimlər tərəfindənsə öyrədilməsi açıq-aydın görünür. Belə olmasaydı, onlar Qurultayın Rəyasət heyətinə yazılı müraciət etməli, sədrliyə namizədliklərinin qeydə alınmasını istəyərdilər. Gələcək sədr kimi platformalarını çap edib qurultay nümayəndələrinə paylamalıydılar. Amma nə bunların başbilənləri, nə də özləri bunu etməyiblər. Xətrlərinə dəyməsəydi, deyərdim ki, ağılları kəsməyib. Sosial şəbəkədə yazılan təhqirləri nəzərə alsaq, onlara söz verilsəydi, nələr baş verəcəyini proqnozlaşdırmaq çətindir.
Bir işi görməzdən əvvəl adam özünə sual verməlidir: mən bunu haqq eləmişəmmi? Bu yerdə suala cavab mənfidir. Nizamnamə və demokratiya populist çıxışlar üçün deyil və şantaj üsuluna çevrilməməlidir”.
Yazıçı Narıngül Nadir qurultayın iştirakçısı olduğunu və Anara səs verdiyini dedi.
“Ümumiyyətlə, qurultay nümayəndələri demək olar ki, böyük səs çoxluğuyla Anarı dəstəkləyib. Nümayəndələr kimi istəyirlər onu da özlərinə sədr seçirlər. Anar Azərbaycanın dəyərli ziyalısı, ictimai xadimi, istedadlı yazıçısıdır. Onun Azərbaycan ədəbiyyatında, mədəniyyətində xidmətləri danılmazdır. Anar istedadlı gənclərə həmişə dəstək olub, qayğı göstərib. Onların arasında bu qayğını qiymətləndirənlər də olub, eyforiyaya düşüb hər şeyi unudanlar da".
N.Nadir düşünür ki, Anar daha böyük vəzifələrə layqidir:
“Bizim bir ağrılı tərəfimiz də var ki, dəyərlərimizi qiymətləndirə bilmirik. Mən deyərdim ki, Anar daha böyük vəzifələrə layiqdir, amma özünün də dəfələrlə qeyd etdiyi kimi yazıçıların mühiti ona daha doğmadır. Görülən işlərin mütləq nöqsan tərəfi də olur. Amma bunu şişirtmək, qarışqadan fil düzəltmək də doğru deyil”.
Xanım yazıçı narazılıqlarla bağlı, həmçinin namizədlər barəsində də fikirlərini bildirdi:
“Narazılıq edənlər daha çox yaş məsələsinə toxunurlar. Əgər bu yaşda insanın sağlamlığı yerindədirsə, davamlı şəkildə yaradıcılıqla məşğul olursa, böyük bir təşkilatın yükünü çiyinlərində daşıya bilirsə, biz buna sevinməliyik.
Namizədliklərini irəli sürən gənclərə gəldikdə isə mənim məlumatıma görə onlar rəsmi şəkildə namizədliklərini qeydə aldırmayıblar. Eyni zamanda platformalarını təqdim etməyiblər. Yəqin ki, gələcəkdə bunu nəzərə alacaqlar və indidən onlara uğurlar arzulayıram. Məncə onlar bundan sonra Yazıçılar Birliyi ilə daha sıx əməkdaşlıq etməli, öz təklif və qeydlərini bildirməli, gələcəkdə sədrliyə namizəd kimi təcrübə toplamalıdırlar”.
Xatırladaq ki, AYB-nin sonuncu qurultayı 2014-cü ildə keçirilib və Xalq yazıçısı Anar sədr seçilib. O, 1987-ci ildən Birliyin sədridir.
Oğuz Ayvaz