Dekabrın 6-da Heydər Əliyev Sarayında görkəmli Azərbaycan bəstəkarı, Xalq artisti Rauf Hacıyevin 100 illiyi münasibətilə “Bu həyat qədər” adlı estrada-caz konserti təşkil olunub.
Ednews xəbər verir ki, gecədə Xalq artistləri Azər Zeynalov, Salman Qəmbərov & “Bakustik-Caz”, Əməkdar artistlər İsfar Sarabski, Zaur Əmiraslanov, Afaq Abbasova, tanınmış ifaçılar DiHaj, Fərid Əliyev, Elbəy Məmmədzadə (trio), Vüsal Rzasoy (rock band), Rövşən Qəhrəmanov, Fəxri Kazım Nicat, İlhamə Qasımova və Q.Qarayev adına Azərbaycan Dövlət Kamera Orkestri, “Qaya” Dövlət Ansamblı, R.Behbudov adına Azərbaycan dövlət Mahnı Teatrı nəzdində Estrada-simfonik orkestri, Baku Brass Big Band, H3 Collective çıxış edib. Onlar R.Hacıyevin bəstəsi olan mahnıları və instrumental kompozisiyaları səsləndiriblər.
Xatırladaq ki, Prezident İlham Əliyev sənətkarın anadan olmasının 100 illiyinin dövlət səviyyəsində qeyd olunması ilə bağlı Sərəncam imzalayıb. Sərəncama əsasən, Mədəniyyət Nazirliyi tərəfindən müvafiq tədbirlər planı hazırlanıb. Tədbirlər planına uyğun olaraq, il ərzində ölkəmizdə və xaricdə müxtəlif tədbirlər və layihələr həyata keçirilib.
Qeyd edək ki, Rauf Hacıyev rəngarəng yaradıcılıq palitrasına malik sənətkar kimi Azərbaycanın musiqi mədəniyyəti tarixində özünəməxsus yer tutur. Müxtəlif janrlarda əsərlər, o cümlədən simfoniya, oratoriya və kantatalar meydana gətirən bəstəkara uğurlu səhnə təcəssümü tapmış operettaları xüsusilə geniş şöhrət qazandırıb. R.Hacıyevin milli motivlərlə müasir üslubun vəhdətində yaratdığı vətənpərvər ruhlu lirik mahnılar məşhur ifaçıların repertuarına daxil olaraq, Azərbaycan mahnı janrının inkişafında əhəmiyyətli rol oynayıb. Onun sənətinin yüksək bədii keyfiyyətləri kinofilmlər və teatr tamaşaları üçün bəstələdiyi musiqi lövhələrində də aydın təzahürünü tapıb.
Günel Həsənova