Ədəbiyyat üzrə dünyanın ən nüfuzlu mükafatı Nobel hesab edilir. Azərbaycan ədəbiyyat tarixindən indiyə kimi heç bir müəllif bu mükafatı qazanmayıb.
Ednews yazıçı, şairlərə sorğu ünvanlayıb - Azərbaycanda Nobel mükafatına layiq yazıçı kimdir? Cavabları təqdim edirik:
Xalq yazıçısı Natiq Rəsulzadə:
“Nobel mükafatına kimi gəldi təqdim eləmək olmaz. Düşünürəm ki, nasirlər arasında yox, şairlər arasında çox layiqli namizədlər var. Təbii ki, istedadlı nasirlərimiz var. Amma dünya ilə müqayisə etdikdə - Qabriel Qarsiya Markes səviyyəsinə çatan yoxdu. Mən özüm də başda olmaqla hələ o səviyyədə nasir Azərbaycan ədəbiyyatında yoxdu. Çox gözəl, zəngin poeziyamız var. Mən düşünürəm ki, həqiqətən də belə bir imkan olsaydı şairlərdən namizədlik təklif edə bilərik.
Konkret şair, şeir adı çəkə bilməyəcəm. Amma Azərbaycan yazıçıları yavaş-yavaş dünya ədəbiyyat arenasına çıxır. Düşünürəm ki, layiqli və səviyyəli yazıçılar şübhəsiz ki, var. Azərbaycan nəsri dünya nəsri ilə müqayisədə cavandı. Bizim çox qədim poeziyamız var. Ona görə də əgər bu mükafata kimi təqdim edə bilərik sualına, mən şairlərdən namizəd göstərərdim. Bizim nəsr Axundovdan başlayır. Ona görə dünya nəsri ilə müqayisədə biz çox cavanıq. Cavan nəsrin kötükləri də bir o qədər dərin olmur. Bütün Şərqdə olduğu kimi, Azərbaycan poeziyası kötükləri dərindi”.
Yazıçı Səfər Alışarlı:
“Yazıçılıq təkcə Nobel mükafatı ilə ölçülmür. Azərbaycan kimi bədbəxt ölkələr öz ədəbi mühitini nizama salmaq, həqiqi istedadları dəstəkləmək əvəzinə fantastik şeylər icad etməyə çalışır. Onlardan biri də sanki yazıçı özünütəsdiqinin və ictimai dəyərliyin yeganə meyarı kimi Nobel mükafatı götürülür. Müasir Azərbaycanda Biləcəridən o yana çıxarılası yazıçı yoxdur. Çünki həqiqi milli mənəvi dəyərlər mühitini yaradan, onu qoruyan, zənginləşdirən və dünyaya təqdim edə bilən ictimai-siyasi dayaqlar məhv edilib. Yalançı, saxta mənəvi dəyərlər sistemi yaradılıb ki, bu da həqiqi sənətin inkişafına ən ciddi maneədir.
Şair Ramiz Qusarçaylı:
“İsa Muğanna”.
Yazıçı Pərviz Cəbrayıl:
“Azərbaycanda "Nobel"ə layiq yazıçılar var, ancaq "Nobel"in texniki şərtlərinə uyğun gələn yazıçı yoxdur. Azərbaycan ədəbiyyatını bir dövlət olaraq təsəvvür etsək, burada Şimali Koreyadakı kimi elə bir qapalı rejim mövcuddur ki, onun zarafatla işlətdiyimiz "Biləcəridən o yana" çıxmaq imkanı mənə azı yüz il imkansız görünür. Mən öz vəsaiti və vəzifə imkanları sayəsində bu qapalı rejimdən kənara çıxan mətnləri nəzərdə tutmuram. Çünki təbii yolla baş verməyən heç bir proses evolyusiyaya apara bilməz”.
Oğuz Ayvaz