Romanlar, hekayələr əsasında ABŞ, Avropa və Türkiyədə seriallar çəkilir. Ekran əsərləri tamaşçıların marağına səbəb olur və bəzən gündəmə də düşür. 

Bəs hansı Azərbaycan romanı əsasında serial çəkilsə maraqla qarşılanar?

Ednews bu barədə sənət adamlarından münasibət öyrənib. Cavabları təqdim edirik:

Xalq yazıçısı Anar:

“Məmməd Səid Ordubadi – “Qılınc və qələm” romanı”.

Xalq yazıçısı Elçin Əfəndiyev:

“Elçin – “Baş” romanı”.

Xalq artisti, Azərbaycan Dövlət Pantomima Teatrının yaradıcısı və baş rejissoru Bəxtiyar Xanızadə: 

“Dəqiq deyə bilmərəm bu haqda. Hərənin öz baxışı var. Bu yaxınlarda Qaçaq Gülsüm barəsində sənədli film izləmişdim. Nə boyda sənədli, bədii fimlər çəkmək olar. Başqa xalqların əlinə keçsə idi bu mövzu qadından böyük dünya yaradardılar. Mövzusu hazırdır, ssenarisi də. Heç olmasa Türkiyənin bununla bağlı film çəkməsini istəyərdim”.

Yazıçı Həmid Herisçi:

“Həmid Herisçi - "Solaxay" romanı”.

Yazıçı Zahid Sarıtorpaq:

“Hər halda elə bir roman var yəqin ki... Əsas odur əsərin alt qatı olsun, qalanı asan məsələdir”.

Kinoşünas, rejissor Ayaz Salayev:

“Bu barədə heç düşünməmişəm. Elə bir təklifim də yoxdur”. 

Kinoşünas Hacı Səfərov:

“Azərbaycan romanlarını müntəzəm oxumuram. Ona görə də çox geniş cavab verə bilməyəcəm. Rahim Dünyamalının “Tərsinə addımlayan kölgələr” ilə Seymur Baycanın “Quqarkından maraqlı məqamlar” hekayələr çıxartmaq olar”.

Şair Aqşin Yenisey:

“Seymur Baycan - "Ət və ət məhsulları" romanı.

Şair Qismət Rüstəmov:

“Rəhmətlik Tariyel Vəliyevin çəkdiyi televiziya tamaşaları vardı, onları müəyyən bugünkü sitkomların, yaxud serialların rüşeymi saymaq olar. 

Serial kimi müasirləşdirilmiş variantda Yusif Vəzir Çəmənzəminlinin "Studentlər"ini işləmək olar, sonra tutalım, Süleyman Rəhimovun cild-cild əsərləri hazır xammaldı, sujeti, intriqanı, ayrı-ayrı epizodları götürüb, yumor qatını bərpa eləyib nəsə çıxartmaq olar”.

Yazar Sevinc Elsevər:

“Süleyman Sani Axundovun “Qaraca qız” hekayəsi əsasında uşaqlar üçün cizgi serialı çəkmək olar. Dünya ədəbiyyatından "Səfillər", "Heidi ", “Don Kixot “ və s əsərlər əsasında cizgi seriallar çəkilib. Mənim “Şəhər” romanım əsasında “Qız yükü” adlı serial çəkilib, məlumatınız var. 

Serial yaradıcıları elə əsərləri seçirlər ki, az büdcə ilə çəkmək mümkün olsun. Bir də əlbəttə, serial mövzusu olaraq, elə əsərlər seçilir ki, ekran dramaturgiyası ilə səslənsin. Ekran dramaturgiyası ilə səsləşməyən əsərləri çəkmək mümkün deyil. Demək istəyirəm ki, heç də bütün romanlar əsasında film, yaxud serial ssenarisi yazmaq mümkün deyil. Ümumiyyətlə, sizin bu sualınız göründüyü qədər də sadə sual deyil. Xüsusən kinematoqrafiya sahəsindən, ekran işindən başı çıxan adamlar üçün” .

Oğuz