Azərbaycan Televiziyasının təşkilatçılığı ilə Milli Qəhrəman Mübariz İbrahimovun xatirəsinə həsr edilmiş “Mübariz” adlı film çəkilib.
Film qəhrəmanın 5 yaşından şəhidlik zirvəsinə ucalana qədər davam edən şərəfli həyat yolundan bəhs edir. Filmin əsas kadrları Mübariz İbrahimovun doğulduğu Biləsuvar rayonunda və döyüş yolu keçdiyi Tərtər rayonunda çəkilib.
Film barəsində yaradıcı heyət fikirlərini Ednews ilə bölüşüb. Heyət ekran işinin ideyası, məqsədi, ötürdüyü mesaj və digər detallar barədə maraqlı açıqlamalar verib.
Filmin quruluşçu rejissoru Natiq Novruzov cəmiyyətimizdə gənclər arasında vətənpərvərliyin təbliğinə ehtiyac olduğunu və qəhrəmanlarımızın xatirəsini yaşadan belə filmlərin çəkilməsinin bu təbliğatda böyük rol oynadığını bildirib.
“Mübariz İbrahimov vətəni, yurdu sevən hər kəs üçün bir qəhrəmanlıq simvoluna çevrilib. 44 günlük Vətən savaşında şəhidlik zirvəsinə ucalan qəhrəmanlarımız da Mübariz İbrahimovu özlərinə örnək alıb, onun yolunu gediblər. Türkiyə, Rusiya mediası da onun şücaəti haqqında yazırdı. Putinin özü belə Mübariz İbrahimovun qəhrəmanlığını yüksək qiymətləndirmişdi. Onun xatirəsini əbədiləşdirməkçün çıxdığımız yolda bir məqsədimiz var idi – övladlarımızı Mübariztək bir oğul kimi yetişdirmək. Cəmiyyətimizdə uşaqlarımız, gənclərimiz arasında vətənpərvərliyin təbliğinə ehtiyac var. Bu mövzuda filmlərin çəkilməsi təbliğatda böyük rol oynayır. Bugünkü gündə bizə mübarizlər lazımdır, bayağı filmlər, bayağı aktyorlar yox.
Çəkilişlərə başlamazdan öncə Mübarizin ailəsi ilə də görüşdük, oğulları haqqında film çəkiləcəyini eşidəndə duyğulandılar. Biləsuvarda keçirilən filmin qala gecəsində Mübariz İbrahimovun atası Ağakərim İbrahimov bizə dedi ki, “filmə baxdım, ürəyim rahatladı”. Filmdə ata rolunu Xalq Artisti Şamil Süleymanlı, ana rolunu aktrisa Flora Hüseynova, baş qəhrəmanı isə gənc aktyorumuz Hüseyn Əliyev canlandırıb. Filmdə izləyicilərə çatdırmaq istədiyimiz əsas mesaj qəhrəmanlıq, şəhidlik zirvəsinin nə qədər uca olduğudur. Mübariz İbrahimovun döyüş yolu keçdiyi Tərtərdə bütün səngərlərdə, postlarda çəkilişlər etdik. Komandirləri, döyüş yoldaşları ilə də görüşlərimiz oldu, onların dilindən də Mübarizin qəhrəmanlıqları, döyüş yolu barədə gerçəkləri öyrəndik. Film bütövlükdə faktlara əsaslanır. Qismət olsa, gələcəkdə də Vətən uğrunda şəhidliyiə ucalan oğullarımız barədə belə filmlər ərsəyə gətirmək istəyirik”.
Filmin ssenari müəllifi və baş prodüseri Nicat Mənalı da ekran əsəri barədə fikirlərini bölüşüb. O, çəkilişlər zamanı qarşılaşdığı çətinliklərdən də söz açıb.
“Filmin ərsəyə gəlməsində Azərbaycan Televiziyası tərəfindən bizə texniki və hərbi məsələlərlə bağlı dəstək göstərildi. Filmin maddi xərclərinin yarıdan çoxunu isə, öz şəxsi büdcəm, qalan hissəsini də vətənpərvər dostlarımız hesabına qarşılamışıq. Bu filmi çəkmək elə bir şərəfli iş idi ki, bu yolda qarşılaşdığımız bütün çətinlikləri aşmaq da bizə fəxr hissi yaşadırdı. İki il dayanmadan əziyyət çəkdik, elə anlar olurdu ki, bəlkə, başqaları olsa, işi dayandırmağı düşünərdi. Maddi cəhətdən çox sıxıntılarımız oldu, lakin şükürlər olsun ki, öhdəsindən gələ bildik. Bu filmin çəkilməsi, təqdimatı ölkəmiz üçün, xalqımız üçün çox vacib, diqqətəlayiq hadisədir. Düşünürəm ki, film Azərbaycan kinematoqrafiyasında da layiq olduğu yeri tutacaq. Nə dərəcədə uğurlu alındığını deyə bilmərəm, bunu cəmiyyətimiz, izləyicilər qiymətləndirəcək. Ola bilər ki, hansısa məqamlarda səhvlərimiz, çatışmazlıqlarımız olsun. Heç bir film ideal deyil, tənqidlər təbii ki, olacaq. Film, kino sonsuz bir dənizdir, üzdükcə bitməz”.
Qeyd edək ki, aprelin 7-də Biləsuvar rayonunda “Mübariz” filminin qala gecəsi keçirilib. Filminin baş prodüseri və ssenaristi Nicat Mənalı, quruluşçu rejissoru Natiq Novruzovdur. Filmdə “Mübariz” rolunu Hüseyn Əliyev canlandırıb.
Törə Zeynallı