Azərbaycan və Pakistan arasında imzalanan Saziş iki ölkənin yüksək səviyyədə olan münasibətlər fonunda formalaşaraq, bitki təhlükəsizliyinin təmin olunması məqsədini daşıyır və bu sahədə səmərəli əməkdaşlıq mexanizminin yaradılmasına xidmət edir. Saziş 13 maddədən ibarət olmaqla, 5 il müddətinə imzalanıb. Sənəd bitki karantini və mühafizəsi sahəsində təhlükəsizliyi təmin etmək və qarşılıqlı texniki dəstəyin göstərilməsini nəzərdə tutur.
“EDnews” xəbər verir ki, bu, “Azərbaycan Respublikası Hökuməti ilə Pakistan İslam Respublikası Hökuməti arasında bitki karantini və bitki mühafizəsi sahəsində əməkdaşlıq haqqında Saziş”in təsdiq edilməsi barədə” Qanun layihəsində öz əksini tapıb.
Bu saziş hər iki ölkə arasında son illərdə inkişaf edən dostluq və strateji tərəfdaşlıq münasibətlərinin məntiqi davamıdır. Azərbaycan ilə Pakistan arasında münasibətlər hazırda özünün ən yüksək mərhələsindədir. Qardaş Pakistan Respublikası daim beynəlxalq platformalarda Azərbaycanın haqlı mövqeyini dəstəkləyib, xüsusilə 44 günlük Vətən müharibəsi zamanı da Azərbaycanın yanında olduğunu açıq şəkildə bəyan edib. İki ölkə arasında mövcud olan sıx dostluq və qardaşlıq münasibətləri müxtəlif sahələrdə, o cümlədən kənd təsərrüfatı, elm və mədəniyyət sahələrində əməkdaşlığa ciddi təkan verib.
Bu saziş kənd təsərrüfatı sahəsində əməkdaşlıq üçün mühüm hüquqi baza yaradır və hər iki ölkənin bitki sağlamlığının qorunması sahəsində təcrübə mübadiləsinə töhfə verəcək.
Fatimə Mərdanlı //EDnews
