“Azərbaycan təşkilata üzv ölkələr arasında əməkdaşlığın dərinləşməsi üçün mühüm addımlar atacaq”.
Bunu Ednews-a açıqlamasında Milli Məclisin iqtisadi siyasət, sənaye və sahibkarlıq komitəsinin üzvü, deputat Aydın Hüseynov Azərbaycanda keçirilən İqtisadi Əməkdaşlıq Təşkilatı Parlament Assambleyasının (İƏTPA) Üçüncü Ümumi Konfransı ilə bağlı danışarkən bildirib.
Aydın Hüseynov bildirib ki, konfransda Sədrlik Pakistandan Azərbaycana keçəcək:
“Azərbaycan təşkilatın sədri kimi üzərinə düşən vəzifələrin öhdəsindən layiqincə gələcək. Hazırda ərazi bütövlüyünü təmin etmiş Azərbaycan regionda yeni realıqlar yaradır. Öz güclü iqtisadi potensialını region ölkələrinin üzünə açıb. Həmçinin Qarabağ və Şərqi Zəngəzurda böyük iqtisadi güc və təşəbbüskarlıq fürsətləri artır. Bu baxımdan İƏT ölkələrinə Azərbaycanın iqtisadi potensialından səmərəli istifadə etmək üçün əlverişli imkanlar təmin ediləcək. Nəticədə İƏT-lə Azərbaycan arasında qarşılıqlı əməkdaşlığın genişləndirilməsində yeni mərhələ başlanacaqdır”.
Deputatın fikrincə, İƏTPA-nın Üçüncü Ümumi Konfransı ölkəmizin mühüm uğurlarından biridir:
“Konfransın Milli Məclisdə keçirilməsi ölkəmizin parlament institutunun siyasi proseslərdə olduqca mötəbər statusunun olmasına dəlalət edir. Bu, Azərbaycanın regional siyasi proseslərin mərkəzinə çevrildiyini təsdiqləyir”.
Millət vəkilinin sözlərinə görə, hazırkı konfransda müzakirə olunacaq məsələlər üzv dövlətlər üçün xüsusi əhəmiyyət kəsb edir:
“Post-pandemiya dövründə əməkdaşlığın daha da artırılması, əlaqələrin dərinləşməsi ilə bağlı yaxşı fürsət və imkanlar yaranıb. Təşkilata üzv ölkələr arasında faydalı müzakirələrin aparılması ilə bir sıra məsələlər öz həllini tapacaq”.
Xanlar Əlibəy