Rusiya Ermənistanda vahid iqtisadi məkan yaradır.
Bu barədə Rusiya və Ermənistan baş nazirlərinin müavinləri Aleksey Overçuk və Mher Qriqoryan “İqtisadi Əməkdaşlıq Proqramı”nı imzalayıblar. Bildirilir ki, bu proqram 2025-ci ilə qədər davam edəcək.
Həmçinin Ermənistan və Rusiya bu proqramda milli valyutalarda qarşılıqlı ticarətə keçəcəklər. Bununla yanaşı Rusiya tərəfindən Ermənistanda Strateji İnkişaf Mərkəzi yaradılacaq. Rusiya şirkətləri Ermənistanda tam dövrəli istehsal müəssisələri quracaqlar.
Maraqlıdır ki, Ermənistanda anti-Rusiya fəaliyyətinin gücləndiyi bir zamanda niyə Ermənistan Rusiya ilə belə əməkdaşlıq etmək qərarına gəlib?
Bu barədə iqtisadçı-ekspert Natiq Cəfərli Ednews-a açıqlamasında bildirib ki, əslində bu hadisə Ermənistan üçün yenilik deyil.
“Ermənistan Rusiyanın başçılıq etdiyi bütün ittifaqların üzvüdür. Həm gömrük, həm Avrasiya ittifaqlarının, həm KTMT-nin, həm də MDB-nin üzvüdür. Ermənistan iqtisadiyyatının 70 faizi Rusiyanın əlindədir. Strateji sahələr isə 100 faiz Rusiyanın əlindədir. Elektrik enerjisi, qaz təchizatı, dəmir yolları Rusiyanın nəzarətindədir”.
İqtisadçı qeyd edib ki, son zamanlar Ermənistan cəmiyyətində anti-Rusiya əhval-ruhiyyəsinin artmasının səbəbi 44 günlük savaşdakı məğlubiyyəti həzm etməmələrindən irəli gəlir.
“Nədənsə Ermənistan cəmiyyətinin böyük bir hissəsi düşünür ki, burada Azərbaycan Ordusunun fədakarlığı yox, Rusiyadan dəstək görməmələri onların məğlubiyyətinə səbəb olub. Təbii ki, bu çox səhv yanaşmadır. Ona görə də Ermənistan cəmiyyəti hələ də çırpınır. Bu məğlubiyyətin səbəblərini özlərinin apardığı işğalçı siyasətdə yox, kənarda axtarırlar. Buna görə də Ermənistanda anti-Rusiya əhval-ruhiyyəsi var. Rusiya da Qərbin bundan istifadə etməyə çalışdığını görür. Biz də son zamanlar Qərbin Ermənistan təsir riçaklarının artırılmasının şahidi oluruq. Rusiya da buna əks-həmlə kimi Ermənistanla iqtisadi əlaqələrin genişlənməsi ilə cavab verməyə çalışır”.
Ayan Rzayeva
