Milli Məclisin plenar iclasında sosial məsələlər yenidən gündəm mövzusuna çevrilib.
Bu məsələlər arasında uşaqların və yetkinlik yaşına çatmayan şəxslərin problemləri daha çox qabardılıb.
Həssas sosial qrupların problemlərinə toxunan deputat Tahir Kərimli öltən il ölkəmizdə 112 min uşağın dünyaya gəlməsi barədə məlumat verərkən, hər bir körpə uşağın hesabına 2000 dollar məbləğində pul keçirilməsinə çağırış edib.
Eyni zamanda T.Kərimli əhalinin qaz ödənişlərində çətinliklərlə üzləşdiyini qeyd edib edib. Deputat Neft Fondunun 2.5 % vəsait ayrılmasını əsas tuturaq, 1 milyondan çox ailəyə kommunal ödənişlər üçün 200 dollar dəyərində yardım edilməsini məsləhət görüb.
Məsələ ilə bağlı Ednews-a şərh verən iqtisadçı-ekpsert Rəşad Həsənov hesab edib ki, ölkədə sosial şəraitin və sosial təminatın normallaşdırılması üçün geniş imkanlar var.
Söhbət zamanı o, qeyd edib ki, ölkənin neft strategiyasının prinsiplərindən biri resurslardan əldə olunan gəlirlərin gələcək nəsillərə ötürülməsidir.
“Neft-qaz ilə zəngin və güclü iqtisadi potensiala malik olan ölkələrdə doğulan hər bir körpə uşağın hesabına pul köçürülür. Hesab edirəm ki, ölkəmizdə də belə bir mexanizm tətbiq edilməlidir. Ona görə ki, uşaq böyüyüb həddi-bulağa çatanda və vətəndaş kimi öz həyatına qədəm qoymağa başlayanda ilkin dövrlərdə öz ideyasını həyata keçirə bilməsi üçün müəyyən imkanlara sahib olmalıdır. Həmin gənclərin körpə ikən hesablarına yatırılan vəsaitlər onların keyfiyyətli təhsil almasına, biznes təşəbbüslərinin reallaşmasına və mənzil şəraitinin yaxşılaşdırılmasına ciddi dəstək ola bilər. Bu səbəblərə görə, belə bir mexanizmin tətbiq edilməsini məqbul hesab edirəm. Bununla bərabər, məbləğ ətrafında hesablamalar aparılmalı və müvafiq faizlər müəyyən olunmalıdır”.
Kommunal xərclərin ödənilməsində problemlərin aradan qalxmasına gəlincə isə Rəşad Həsənovun fikrincə, bu məsələdə bir çox ailələrə, xüsusilə həssas sosial qruplara maliyyə dəstəyinin göstərilməsi ətrafında ciddi müzakirələr aparılmalıdır.
“İnkişaf etmiş ölkələrdə qiymət artımlarının ailə təsərrüfatlarına vurduğu ziyanların neytrallaşdırılması ilə bağlı müxtəlif proqramlar tətbiq olunur. Məsələn, Britaniyada yeni hökumət ölkə əhalisinin kommunal ödənişlərinin kompensasiya edilməsi ilə bağlı böyük layihələri nəzərdən keçirirlər və artıq bəzilərini icra etməyə başlayıblar. Türkiyədə də bələdiyyələr və ya mərkəzi hakimiyyət orqanları tərəfindən həssas sosial qrupların həyat şəraitini təmin edən müvafiq dövlət proqramları həyata keçirilir. Yaxşı olar ki, ölkəmizdə daha səmərəli formada ehtiyacı olan ailələrə müvafiq maliyyə dəstəyin göstərilməsinə, eləcə də dövlət proqramlarının tətbiqinə şərait yaradılsın. Bütün bunlar yoxsulluğun azadılmasına və gəlirlərin ədalətli bölüşməsinə öz müsbət təsirini göstərəcək”.
Yunis Abdullayev