Bəzi un məhsullarının qiymətlərində endirimlər müşahidə edilir. Sosial şəbəkələrdə yayılan məlumatlara görə, “Karat Holding” şirkəti bir kisə “Karmen” ununun qiymətini 41 manatdan 38 manata endirdiyini bildirilib.

Bir çoxları artıq bu endirimlərin çörəyin qiymətinə təsir edəcəyini düşünürlər.

Məsələ ilə bağlı yerli mətbuata açıqlama verən “Azad İstehlakçılar” İB-nin sədri Eyyub Hüseynov bildirib ki, çörəyin qiymətinin aşağı düşməsi üçün unun bir kisəsinin qiymətinin 10-15 % aşağı düşməsi lazımdır. Onun sözlərinə görə, hazırda un kisəsinin 1-3 manat ucuzlaşması çörəyin qiymətinin aşağı düşməsinə səbəb ola bilməz.

Ümumiyyətlə, yaxın zamanda bir çox un məhsullarının və müxtəlif növ çeşidli çörəklərin qiymətlərində endirimlərin müşahidə edilməsi nə dərəcədə ehtimal oluna bilər?

İqtisadçı Asif İbarhimov Ednews-a açıqlamasında qeyd edib ki, un istehsal edən bəzi özəl müəssisələr müəyyən səbəblərdən dolayı öz məhsullarında endirimlər edirlər.

“Ötən ilin sonuna doğru bəzi un məhsullarının qiymətlərində endirimlərin şahidi olduq. Bunun əsas səbəbi isə həmin müəssisələrin alıcılıq miqdarının aşağı düşməsidir. Bəzi statistik məlumatlar göstərir ki, bu sahədə fəaliyyət göstərən özəl müəssisələr un məhsullarının tədarükündə bir sıra maliyyə çətinlikləri ilə üzləşiblər. Bu məqsədlə qiymətlərdə endirimlər etməyə məcbur olublar. Nəzərə almaq lazımdır ki, burada xammalın qiyməti ilə yanaşı həmin məhsulun ərsəyə gətirilməsində həyata keçirilən xidmətlər və bir sıra sahələr, o cümlədən emal prosesində zəruri vasitələr müəssisənin maliyyə strategiyasında əsas və önəmli faktorlar hesab olunur. O ki qaldı çörəyin qiymətində dəyişiklikliyə, biz bilirik ki, çörək strateji məhsul hesab olunur. Yalnız Azərbaycan Respublikasının Tarif Şurası çörəyin qiymətində artımlar və endirimlər etmək səlahiyyətinə malikdir.  Heç bir halda indiyə kimi un məhsullarının qiymətlərinin aşağı düşməsinə əsasən Tarif Şurasının çörəyin qiymətlərində dəyişikliklər etməsinə şahidi olmamışıq. Sonda qeyd edim ki, yaxın zamanda un məhsullarının və çörəyin qiymətlərində endirimlər müşahidə edilməyəcək”.

İqtisadçı Elşad Məmmədov da həmkarı ilə eyni fikirləri bölüşüb.

O, açıqlamasında hesab edib ki, ticarətdə qiymətlərin artması və endirimləri ilə bağlı xüsusi qaydalar var.

“İstənilən məhsulun qiymətində bahalaşma amilləri aradan qaldırılsa belə, bu demək deyil ki, digər məhsulların qiymətləri də əvvəlki vəziyyətinə düşəcək. Ticarətdə mövcud qanunlar və qaydalar onu deməyə əsas verir ki, sahibkarlar və istehsal müəssisələrinin rəhbərləri məhsullarında daha çox yeni qiymətlərə üstünlük verirlər. Çünki onlar öz məhsullarının tədarükü və hasilatı prosesində daşınma və digər xidmətlərin xərclərini, eləcə də satış nöqtələrini nəzərə alırlar. İstisna etmirəm ki, bu il hansısa kiçik əmtəə seqmentlərində və məhsullarda qiymətlər aşağı düşəcək. Bütövlükdə hesab edirəm ki, yaxın gələcəkdə çörəyin qiymətində sistemli şəkildə endirimlərin şahidi olmayacağıq. Əksinə un məhsullarının qiymətlərində növbəti bahalaşma ehtimal olunur. Ona görə ki, dünya miqyasında sürətli inflyasiya gedir. Belə olan halda çörəyin və digər məhsulların qiymətlərinin aşağı düşəcəyini düşünmək mənasızdır”.

Yunis Abdullayev