“Təmiz enerji sahəsində əməkdaşlığa dair özündə bir neçə istiqamət birləşdirən müqavilələrin imzalanması Azərbaycan və BƏƏ-nin hökumətlərarası təcrübə mübadiləsi sahəsində əməkdaşlıq memorandumu imzalamasından bir neçə ay sonraya təsadüf edir. Sazişlər ikitərəfli əməkdaşlığın inkişafı üzrə yeni metodların tətbiqi və uğurlu təcrübə mübadiləsini hədəfləyir. Həmçinin, hökumətlərarası fəaliyyətdə səmərəliliyinin artırılması, gələcəkdə də əməkdaşlığın səviyyəsinin yüksəldilməsi və problemlərə innovativ həll yollarının tapılmasına töhfə verəcək”.
Bu sözləri Ednews-a danışan misirli ekspert, Asiya və Türk dünyası üzrə tədqiqatçı, professor Əhməd Tarabek bildirib. Onun sözlərinə görə, Azərbaycan Prezidentinin Əbu Dabi səfəri və iki ölkə arasında müxtəlif sahələrdə əməkdaşlığın gələcək perspektivləri çox yüksəkdir. Azərbaycan BƏƏ üçün mühüm strateji tərəfdaşıdır.
Ekspert qeyd edib ki, “Masdar” şirkəti Azərbaycana yatırım etdiyi biznesin həcminə və investisiyalarına görə iki ölkə arasındakı əlaqələrdə körpü rolunu oynayır:
“Masdar” həmçinin, Azərbaycanda 230 MVt gücündə “Qarabağ” günəş fotoelektrik stansiyasını inkişaf etdirir. Stansiya hər il yarım milyard kilovat-saat elektrik enerjisi istehsalına töhfə verəcək ki, bu da 110 mindən çox mənzilin enerji ehtiyacını ödəməyə kifayət edəcək və ildə 200 min tondan çox karbon emissiyasının qarşısını almağa kömək edəcək”.
Misirli tədqiqatçı onu da bildirib ki, inkişaf etməkdə olan əlaqələr Əmirlik investorlarını iqtisadiyyatın müxtəlif sahələrində əməkdaşlıq üçün Azərbaycana, xüsusən də Vətən müharibəsindən sonra uğurlu yenidənqurma və bərpa prosesinin getdiyi Qarabağa cəlb etməkdədir:
“Bu baxımdan, imzalanan sazişlər iki ölkə arasında səmərəli əməkdaşlığın gücləndirilməsi yolunda mühüm addımdır. Müqavilələr, eyni zamanda, Azərbaycanın bərpa olunan enerji sahəsində hədəflərini reallaşdırmasına və davamlı iqtisadi inkişafa dəstək olacaq”.
Təmiz enerji sahəsində Əbu Dabinin “Masdar” şirkətinin liderlərdən olduğunu vurğulayan Əhməd Tarabek ötən il Azərbaycanın Energetika Nazirliyi ilə şirkət arasında mühüm razılaşma əldə olunduğunu xatırladıb:
“2022-ci ilin iyununda çoxsaylı texnologiyalar və ümumi istehsal gücü 10 giqavat olan enerji təchizatı vasitəsilə bərpa olunan enerji sahəsində müştərək proqram hazırlanması üçün saziş imzalandı. Bu, Azərbaycan tarixində eyni qəbildən olan ən böyük razılaşma idi. Azərbaycan 2030-cu ilə qədər bərpa olunan mənbələrindən əldə edilən enerji payını 30%-ə çatdırmağı və ölkə iqtisadiyyatını şaxələndirməyi hədəfləyir. Buna görə də Azərbaycan iqtisadiyyatının mühüm qolu olan “SOCAR”, həm də, ölkənin enerji təhlükəsizliyinin dəstəkçisidir”.
Ekspert bildirib ki, BƏƏ Azərbaycanın əsas ticarət tərəfdaşlarından biridir:
“Azərbaycan və BƏƏ hökumətləri növbəti mərhələdə iki ölkə arasında koordinasiyanı, xüsusən mövcud iqtisadi, ticari əlaqələri artırmaq məqsədilə birgə işçi qrupların yaradılması üzərində işləyir. İki ölkə arasında qeyri-neft ticarəti 2020-ci ildə təxminən 375 milyon dollar olduğu halda, 2021-ci ildə 1 milyard ABŞ dollarına yüksəlib”.
Ekspert Azərbaycan-BƏƏ əməkdaşlığının artıq yeni mərhələyə qədəm qoyduğuna diqqət çəkib:
“İki ölkə arasında əməkdaşlıq müqavilələrinin imzalanması əlaqələrin genişləndirilməsi, hökumətlərarası fəaliyyətin modernləşdirilməsi, bilik və təcrübə mübadiləsi, habelə BƏƏ-nin müasir iş metodologiyalarından istifadə sahəsində atılmış müsbət və məqsədyönlü addımdır. İkitərəfli müqavilələr Azərbaycanla BƏƏ arasında əməkdaşlığın genişləndirilməsi və gələcəkdə də davam etməsinə, xüsusən də, hökumətin fəaliyyətində müasirləşmə və sosial innovasiyaların tətbiqi sahəsinə öz töhfələrini verəcək”.
Qeyd edək ki, Azərbaycan Prezidenti İlham Əliyev ötən həftə “Masdar” şirkətinin ev sahibliyi etdiyi qlobal platforma – “Əbu Dabi Dayanıqlılıq Həftəsi”də iştirak etmək məqsədilə Birləşmiş Ərəb Əmirliklərinə işgüzar səfər etdi. Səfər çərçivəsində İlham Əliyevin Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyanın görüşü baş tutdu. Görüşdə Azərbaycanla Birləşmiş Ərəb Əmirlikləri arasında siyasi, iqtisadi, təhlükəsizlik və digər sahələrdə sıx əməkdaşlıq əlaqələrinin qurulduğu və bunun gələcəkdə də davam etdirilməsinin əhəmiyyəti vurğulandı.
Törə Zeynallı