Milli Məclis uzun illərdən sonra yenidən “Rəqabət Məcəlləsi” haqqında qanun layihəsinin qəbul edilməsi məsələsini gündəliyinə daxil edib. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti tərəfindən hazırlanan məcəllənin layihəsi Milli Məclisin İqtisadi Siyasət, Sənaye və Sahibkarlıq komitəsi tərəfindən yanvarın 24-də yenidən müzakirə edilib. Qanun layihəsinin bu dəfəki sessiyada qəbul ediləcəyi gözlənilir.
Ekspert Emin Qəribli Ednews-a açıqlamasında bildirib ki, iqtisadi mühitdə rəqabət təbii şəkildə formalaşan amildir və sağlam rəqabət iqtisadiyyatın bütün sahələrində inkişafın əsas göstəricisidir:
“Rəqabət Məcəlləsinin qəbul edilməsi çoxdan gözlənilən bir addım idi. Ümumiyyətlə, bununla əlaqədar müvafiq qanunvericilik olmalıdır, xüsusən də, konkret məcəllə. Qanun layihəsi qəbul edilərkən bütün obyektiv səbəblər, yeni reallıqlar nəzərə alınmalıdır. Əlbəttə, bu qanun layihəsi ölkədə investisiya mühitinin yaxşılaşdırılmasına müsbət təsir göstərəcək. Bilirsiniz ki, bu yaxınlarda Prezident İlham Əliyev Bakıda və bölgələrdə yeni azad iqtisadi zonaların yaradılacağı barədə elan verdi. Qarabağda və digər bölgələrimizdə iqtisadiyyatın inkişafı məqsədilə kifayət qədər güzəştlər tətbiq olunur. Dövlət və sahibkarlar ölkəyə xarici investisiyaların cəlb olunmasında maraqlıdır. Rəqabət Məcəlləsinin qəbul edilməsi bu istiqamətdə də irəliləyişlərə səbəb olacaq”.
Ekspert onu da bildirib ki, müvafiq icra hakimiyyəti orqanları tərəfindən yaradılacaq qurumlar qanunun tətbiqinə nəzarət etməlidirlər:
“Sahibkarların qanunun tələblərinə əməl etməsi üçün nəzarət mexanizmi formalaşdırılmalıdır. Müvafiq monitorinq qrupları yaradılmalı, nöqsanlar olarsa aşkar edilməlidir”.
Xatırladaq ki, “Rəqabət Məcəlləsi” 2006-cı ildə Milli Məclisə təqdim edilmişdi, lakin, üçüncü oxunuşdan keçməmişdi. Məcəllənin qəbul edilməsinin məqsədi daxili bazarda azad rəqabət mühiti formalaşdırmaq, inhisarçılıq və monopoliyanın qarşısını almaq, bütün sahibkarlar üçün bərabər iqtisadi şərait yaratmaqdır. Bu qanun qiymət siyasətinə də öz təsirini göstərəcək.
Törə Zeynallı