Xəbər verdiyimiz kimi, Dövlət Statistika Komitəsinin yanvar ayında açıqladığı statistik nəticəyə görə, Azərbaycanda ətin qiymətində bahalaşma müşahidə olunub. Qurumdan bildirilib ki, Azərbaycanda ət və ət məhsulları 2022-ci ilin dekabr ayında ötən aya nisbətən 100.2% olub ki, bu da aylıq müqayisədə 0.2% artım deməkdir. Həmçinin ət məhsulları ötən ilin dekabrında 2021-ci ilin dekabr ayına nisbətən 116.3% təşkil edib ki, illik müqayisədə 16.3% bahalaşma deməkdir.

Bir müddət öncə ekspertlərin ətin qiymətində artımın olacağı ilə bağlı proqnozları özünü doğruldur. Bakıya nisbətən bölgələrdə ətin münasib qiymətə satıldığı bildirilir. Amma bölgələrdə də bahalaşma tendensiyası müşahidə edilməkdədir. 

Bahalaşmanın səbəbləri nələrdir? Niyə ətin qiyməti fasilələrlə bahalaşır?

Məsələ ilə bağlı danışan iqtisadçı-ekspert Eyyub Kərimli Ednews-a bildirib ki, ətin qiymətinə birbaşa təsir edən bir neçə amil var:

“Burada mövsümlə əlaqədar olaraq yemin qiymətinin artması səbəb kimi göstərə bilərik. Həmçinin müharibə səbəbindən Ukraynadan ət idxalının azalmasıdır. Toyların, xeyir işlərin sayı artmaqdadır. Qarşıdan Novruz bayramı da gəlir. Bizdə tendensiyadır, bayramqabağı məhsulların qiyməti bəzən artır. Eləcə də örüş yerlərinin az olması fermerlərə də buynuzlu heyvanı saxlaması baha başa gəlir. Çünki yemin qiyməti artıb. Hələ örüş  yerlərində təzə ot bitməyib. Heyvanları quru yemlərlə yemləyirlər. Bu da qiymətin artmasına təsirini göstərir. Düşünürəm ki, qiymət artımı mövsümi amillərlə əlaqədardır. İki-üç aya biz bu qiymətlərin enməsini müşahidə edəcəyik. Çünki yeni örüş yerlərində ot bitəndən,  heyvanların əvvəlki kimi yemlənməsindən sonra qiymətlər də aşağı düşəcək”. 

Oğuz