Dövlət Statistika Komitəsinin məlumatına görə, bu ilin avqust ayında sümüklü mal ətinin orta aylıq pərakəndə satış qiyməti 14,10 manata, sümüksüz mal ətinin orta aylıq pərakəndə satış qiyməti 16,39 manata, qoyun ətinin orta aylıq pərakəndə satış qiyməti isə 15,24 manata qalxıb. Bu ilin əvvəli ilə müqayisədə avqust ayında sümüklü mal əti 8 faiz, sümüksüz mal əti 6,7 faiz, qoyun əti 9,1 faiz bahalaşıb. Ümumiyyətlə, cari ildə ətin davamlı şəkildə bahalaşması müşahidə edilib.
Bu tendensiya payız aylarında da davam edəcək?
Mövzu ilə bağlı Ednews-a iqtisadçı-ekspert Xalid Kərimli qiymətlərin artımını ət istehsalçılarının xərclərinin artması ilə əlaqələndirib:
"Mal əti bazarında qiymətləri dövlət tənzimləmir, bazar tənzimləyir. Bu gün ölkədə ət məhsullarına olan tələbatın 85 faizini yerli istehsal təmin edir. Qoyun əti üçün isə bu rəqəm 97 faizdir. Çünki qoyun əti istehsalı ətrafımızda ən yaxşı bizdə inkişaf edib. Hardasa 80 faiz quşçuluq məhsulları istehsalı ilə özümüzü təmin edirik və 90 faiz mal əti ilə öz-özümüzü təmin edirik. Bunların hər biri öz istehsalımız olsa da, yem komponentləri cəhətdən idxaldan asılıyıq. Ət istehsalında isə maya dəyəri xərclərinin əhəmiyyətli hissəsi - 70 faizə qədəri yem komponentləri üzrə formalaşır. Bundan əalvə, soya və dərman məhsulları, eləcə də bu sahədə istifadə olunan buğda və arpanın dəyəri də qiymətlərə təsir edir. Bu baxımdan da ət istehsalında xərclər artıb".
Xalid Kərimli vurğulayıb ki, Azərbaycan üçün ucuz bazarlar sayılan Ukrayna və Rusiyanın indiki dövrdə əlçatmaz olması yerli təsərrüfatların qiymətləri qaldırmasına yol açır:
"Ukrayna və Rusiya kimi ucuz bazarların əlçatmaz olması yerli fermer və ishehsalçıların qiymətləri qaldırmasına şərait yaradır. Yerli bazarda mal əti 2 formada təklif olunur. Birincisi, intensiv təsərrüfatlar, ikincisi isə ev təsərrüfatları. İntensiv təsərrüfatlarda qiymətlərə yem komponentləri təsir göstərir. Ev təsərrüfatlarında isə qiymətlərin bahalaşmasına yol açan amil otun qiymətinin artmasıdır".
Oğuz