Hərraclarda dollara tələbin artması müşahidə olunur. 

Belə ki, noyabrın son günündə 77.8 milyon dollarlıq tələb, dekabrın 6-da 95.1 milyona yüksəlib. Bundan əlavə son 3 hərracda isə 241.1 milyon dollar satılıb. 

Bu, bazarda nə kimi dəyişikliklərə yol açacaq?

Mövzu ilə bağlı Ednews-a danışan iqtisadi ekspert Natiq Cəfərli dollara tələbin artmasının səbəbinin hər ilin sonunda baş verən ticari dəyişikliklər olduğunu bildirib:

“İl sonunda dollara tələbin artması normal və gözlənilən bir haldır. Bu əsasən Yeni İl bayramında idxala ehtiyacın artması ilə əlaqəlidir. Əlavə olaraq da, dövlət büdcəsinin yerinə yetirilməsi üçün manatla transferlərə ehtiyac artır. Dördüncü rüb dolların ən çox xərclənən dövrüdür. Bu halda manatla transferlərin sayının artırılmasına ehtiyac yaranır. Çünki, burada donor neft fondudur və buna görə də neft fondu daha çox dollar satıb, manata çevirib dövlət büdcəsinə transfer etmək məcburiyyətində qalır. Bundan başqa bayramlar ilə bağlı olaraq xarici səfərlərin çoxalması dollara tələbi artırır”. 

Ekspert bu vəziyyətin manatın məzənnəsinə təsirindən də danışıb. Onun fikrincə, manatın məzənnəsinin bundan mənfi şəkildə təsirlənməsi gözlənilmir. 

“Hələ ki, manat üzən məzənnəyə keçirilməyib və buna ehtiyac da yoxdur. Faktiki olaraq, manatın məzənnəsi birbaşa Azərbaycan Mərkəzi Bankının qərarlarından asılıdır. Mərkəzi Bank prosesə birbaşa intervensiya etmək imkanlarını qoruyub saxlayır. Ona görə də gələn il manatın məzənnəsinin necə dəyişməsi birbaşa Azərbaycan Mərkəzi Bankının mövqeyindən asılıdır. Düşünürəm ki, növbəti ilin əvvəllərindən bu balans normallaşacaq. Hər il baş verən bu dəyişiklik manatın məzənnəsində qalıcı təsir saxlamayacaq”.

Fərid Axund