Azərbaycanda əhali öz maddi vəsaitini banklarda saxlamaqdansa, daşınmaz əmlak almaq və ya yatırımlarını nağd pul kimi saxlamağa üstünlük verirlər. Bunu cari ilin statistikası göstərir.

Deputat Vüqar Bayramov bildirib ki, banklardan kənarda saxlanılan vəsaitin il ərzində aydan-aya artır. O, bu barədə Ednews-a açıqlaması zamanı deyib.

“Banklardan kənarda nağd pulun həcmində artımlar davam edir. Statistikaya görə, banklarda kənarda 14 milyard 941 milyon manat nağd vəsait var. Bu göstərici ilə ilin ilk 8 ayında 14 milyard 604 milyon manat saxlanılırdısa, bu rəqəm 9-cu ayın sonunda 14 milyard 741 milyon manat olub. Bu il ilk 10 ayın sonunda isə, banklardan kənarda nağd pulun həcmi keçən ilin uyğun dövrü ilə müqayisədə 17% artıb. Bu artım təxmini 5 milyard manata yaxındır”.
Deputatın sözlərinə görə, əhalinin maddi vəsaiti nağd formada bankdan kənarda saxlamasının iqtisadiyyata bəzi ziyanları var. Onun sözlərinə görə, böyük həcmdə nağd vəsaitlərin "Yastıq altında" saxlanılması real sektorun maliyyələşdirilməsinə zərər vurur. 

“Çünki, potensial olaraq həmin pulların çox hissəsinin banklar vasitəsi ilə dövlət iqtisadiyyatına yönəldilməsi mümkündür. Banklar vasitəsilə pulun dövriyyəsi manatın dəyərdə qalmasına kömək edir. Beləliklə, pulun banklarda dövr etməsi əslində istifadəçinin özü üçün də müsbət bir haldır”. 

Vüqar Bayramov əhalinin banklara niyə etibar etmədiyinin səbəblərindən də danışıb. Onun sözlərinə görə, bunun üçün xüsusi təkliflər irəli sürülməlidir. 

“Evlərdə saxlanılan nağd pulun həcminin çox olması onu göstərir ki, banklara inamın artırılması istiqamətində işlərin sürətləndirilməsi vacibdir. Bu kontekstdən, zəif bankların bağlanması deyil, onların konsolidasiyası, yəni birləşdirilməsi mexanizminə ehtiyac var. Hazırda banklarda əhalinin məsələ ilə bağlı marifləndirilməsi prioritet hesab olunmalıdır. Bu nağd vəsaitlərin banklar vasitəsi ilə real sektora yönəlməsinə gətirib çıxara bilər. Beləcə, real sektorda artan pul dövriyyəsi qiymətlərin də yüksəlməməsinə gətirib çıxara bilər. Daşınmaz əmlakın bahalaşması da təbii ki, bununla əlaqədardır”.

Fərid Axund