Dövlət İmtahan Mərkəzi (DİM) hər il ali təhsil müəssisələrinin bakalavriat səviyyəsinin Jurnalistika və İslamşünaslıq ixtisaslarına qəbul olmaq istəyən abituriyentlər üçün qabiliyyət imtahanı keçirilir. 

"EDnews" xəbər verir ki, qabiliyyət imtahanları qruplar üzrə qəbul imtahanın hər iki cəhdi yekunlaşdıqdan sonra başlayacaq. 

Jurnalistika ixtisası üzrə müsabiqədə iştirak etmək üçün abituriyentlər əvvəlcə ümumi qaydada keçirilən test imtahanında iştirak edirlər. Test imtahanının nəticəsindən asılı olaraq qabiliyyət imtahanlarında iştirak etmək üçün qeydiyyatdan keçirlər. Qabiliyyət imtahanında qeydiyyatdan keçmək üçün ümumi balı ən azı 200, imtahanın ikinci mərhələsi üzrə balı isə ən azı 100 bal olmalıdır Qabiliyyət imtahanından məqbul qiymət alan abituriyent bu ixtisas üzrə müsabiqədə iştirak edə bilir.

Bundan əlavə, heç bir istiqamətə daxil olmayan, qəbul üçün xüsusi tələblərin qoyulduğu islamşünaslıq ixtisası da III ixtisas qrupuna daxildir. İslamşünaslıq ixtisası üzrə müsabiqədə iştirak etmək istəyən abituriyent əvvəlcə III ixtisas qrupu üzrə qəbul imtahanı verir, müsabiqə şərtini ödədiyi təqdirdə Dini-Psixoloji Komissiyada müsahibədə iştirak edir. Müsahibədən məqbul qiymət alan abituriyent islamşünaslıq ixtisası üzrə müsabiqədə iştirak etmək hüququ qazanır.

Ümumi orta təhsil bazasında orta ixtisas təhsili müəssisələrinin xüsusi qabiliyyət tələb edən ixtisasları üzrə təhsil almaq istəyən abituriyentlər elektron ərizələrini rəsmiləşdirdikdən sonra, DİM tərəfindən mərkəzləşdirilmiş qaydada keçirilən qəbul (cari ilin abituriyentləri üçün buraxılış) imtahanında iştirak edirlər. Topladıqları ümumi balları DİM tərəfindən müəyyən edilən müsabiqə şərtlərinə uyğun olan abituriyentlər müvafiq komissiyalar üzrə elektron qaydada qeydiyyatdan keçməlidirlər. Qeydiyyatdan keçmiş abituriyentlər qabiliyyət imtahanlarına buraxılırlar.