COP29-un sədrliyi və Beynəlxalq Telekommunikasiya İttifaqının (BTİ) təşkilatçılığı ilə Cenevrədə “Bakıdan Belenə: COP29 və COP30” adlı yüksəksəviyyəli sessiya keçirilib. Tədbirdə dayanıqlı rəqəmsal transformasiyaya doğru qlobal təşəbbüsdə mühüm mərhələ qeyd edilib.
“EDnews” xəbər verir ki , sessiya 83 ölkə də daxil olmaqla 2000-ə yaxın maraqlı tərəf tərəfindən təsdiq edilmiş və Bakıda keçirilən BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında tarixdə ilk “Rəqəmsal gün” çərçivəsində təqdim edilmiş Yaşıl Rəqəmsal Fəaliyyət (GDA) üzrə Bəyannaməyə həsr olunub. Tədbir zamanı iştirakçılar, həmçinin Braziliyanın Belen şəhərində keçiriləcək COP30-a hazırlıqla bağlı müzakirə aparıblar.
Sessiyada əsas məruzəçilər arasında COP29-da BMT-nin İqlim Fəaliyyəti üzrə Yüksəksəviyyəli Çempionu Nigar Arpadarai, Braziliyanın Ümumdünya Ticarət Təşkilatı (ÜTT) və Cenevrədə yerləşən digər iqtisadi təşkilatlar yanında daimi nümayəndəsi səfir Qilyerme de Aqiyar Patriota, BTİ Baş katibinin müavini Tomas Lamanauskas, bu təşkilatın Strateji və planlaşdırma üzrə rəhbəri Katalin Marinesku, COP29-un Fəaliyyət Gündəliyinin Qlobal Təşəbbüslər Qrupunun həmsədri Elmar Məmmədov, COP29 nümayəndə heyətinin üzvü Lalə Hikmət və Braziliya XİN-in İqlim departamentinin elmi-texnoloji məsələlər və ikitərəfli münasibətlər üzrə əlaqələndiricisi Pedro İvo Ferraz da Silva olublar.
Müzakirələrdə COP29-un Yaşıl Rəqəmsal Fəaliyyət üzrə Bəyannaməsi çərçivəsində rəqəmsal həllərin iqlim strategiyalarına inteqrasiyası, həm rəqəmsal, həm də aşağı emissiyalı texnologiyalara, sektorlararası əməkdaşlığa, o cümlədən COP29 ilə sinerji yaradılmasına, COP29 Çoxsektoral Fəaliyyət Yollarına dair Bəyannamə, rəqəmsal texnologiyalar və səhiyyə sahəsində əlaqələr yaratmaqla əldə edilən irəliləyişlərə diqqət yetirilib. BTİ-də Yaşıl Rəqəmsal Fəaliyyətlər üzrə Bəyannamə və UNFCCC-də İqlim Texnologiyaları Mərkəzi və Şəbəkəsinin (CTCN) fəaliyyəti də razılaşdırılıb. Qeyd olunub ki, bu günə kimi COP29-un Yaşıl Rəqəmsal Fəaliyyət üzrə Bəyannaməsi 83 ölkənin hökumətləri də daxil olmaqla 2000-ə yaxın maraqlı tərəf tərəfindən təsdiqlənib.
Tədbirdə rəqəmsal keçidlərin qlobal iqlim fəaliyyətinə dəstək məqsədləri ilə uyğunlaşdırılmasının vacibliyi vurğulanıb və COP29-da GDA üzrə yüksəksəviyyəli ilk dəyirmi masada İqlim sammitinin sədrliyinin təşəbbüsü kimi rəsmi olaraq irəli sürülən yaşıl rəqəmsal fəaliyyət üzrə COP sədrlikləri arasında davamlılığın və bir-birini tamamlamanın vacibliyi qeyd olunub. Üzv dövlətlərin fəal iştirakı ilə sessiya açıq dialoqu asanlaşdıran və COP30-dan əvvəl yaşıl rəqəmsal transformasiya üçün qlobal sürəti artıran interaktiv sual-cavab sessiyası ilə başa çatıb.
Fatimə Mərdanlı // EDnews
