Azərbaycan Turizm Bürosu Orta Şərq və Şimali Afrika  bazarından gələn turistləri ölkəyə cəlb etmək məqsədilə Yaxın Şərqin ən məşhur və geniş istifadə olunan turizm platformalarından biri olan Wego ilə əməkdaşlığa başlayıb.

EDnews xəbər verir ki, bu əməkdaşlıq, Azərbaycanın turizm potensialını regional bazarlarda daha effektiv şəkildə tanıtmaq və turizm sektorunu inkişaf etdirmək istiqamətində atılmış önəmli addımlardan biridir.

Əməkdaşlığın əsas məqsədi Azərbaycanın mövsümdən asılı olmayaraq, dörd fəsildə də turizm üçün əlverişli və maraqlı ölkə olduğunu beynəlxalq səviyyədə nümayiş etdirməkdir. Bu çərçivədə, Azərbaycanın zəngin tarixi, təbii gözəllikləri, mədəni irsi və müasir turizm infrastrukturunun tanıdılması prioritet kimi götürülüb.

Eyni zamanda, layihə ölkəyə gələn turistlərin sayını artırmaq, həmçinin turizm sektorunun iqtisadiyyatdakı payını genişləndirmək üçün effektiv marketinq strategiyalarını tətbiq etməyi hədəfləyir.

Wego, istifadəçilərə ucuz uçuşlar, otellər və səyahət paketləri təklif edən, milyonlarla istifadəçisi olan beynəlxalq turizm platformasıdır. Azərbaycanın Wego ilə əməkdaşlığı turizm məlumatlarının daha geniş auditoriyaya çatdırılması,regionundakı səyahətçilərin Azərbaycana marağının artırılması baxımından böyük əhəmiyyət kəsb edir. Platforma vasitəsilə istifadəçilərə ölkəmizin turizm marşrutları, mədəni və təbii məkanları, qastronomiya imkanları barədə məlumatlar təqdim ediləcək.

Mədinə Məmmədova//Ednews