Azərbaycan Respublikası Prezidentinin xüsusi tapşırıqlar üzrə nümayəndəsi Elçin Əmirbəyovun İspaniya Krallığına işgüzar səfəri iki ölkə arasında siyasi, iqtisadi və diplomatik əlaqələrin inkişafı baxımından mühüm əhəmiyyət kəsb edir. Səfər çərçivəsində o, İspaniyanın Xarici işlər və Qlobal məsələlər üzrə Dövlət katibi Dieqo Martinez Belio, Baş Nazirin Ofisinin Xarici Əlaqələr üzrə Baş Katibi Emma Apariçi, Konqres və Senat rəhbərliyi ilə görüşlər keçirib.

Əmirbəyov İspaniyanın aparıcı beyin mərkəzləri – Elcano Kral İnstitutu və Fundasion Alternativas-da da fikir mübadiləsi apararaq, Azərbaycanın strateji mövqeyini və regional rolu haqqında geniş məlumat verib.

Görüşlərdə Azərbaycan və İspaniya arasında siyasi dialoqun gücləndirilməsi, ticarət, investisiya və parlamentlərarası əlaqələrin genişləndirilməsi məsələləri diqqət mərkəzində olub. Azərbaycan ilə Avropa İttifaqı arasında əməkdaşlıq da əsas mövzulardan biri olub. Xüsusilə Azərbaycanın Avropanın enerji təhlükəsizliyindəki rolu və Orta Dəhliz üzrə yük daşımalarında strateji əhəmiyyəti qarşı tərəfin marağına səbəb olub.

Əmirbəyov, həmçinin Ermənistanla münasibətlərin normallaşması prosesi və Azərbaycanın təşəbbüs göstərdiyi sülh gündəliyi barədə ispaniyalı rəsmiləri məlumatlandırıb. Ermənistanın işğal dövründə Azərbaycana vurduğu ziyan, xüsusilə mədəni irs abidələrinin dağıdılması və mina təhlükəsi barədə ətraflı informasiya təqdim edilib.

Səfər çərçivəsində Elçin Əmirbəyovun İspaniya mediasına verdiyi müsahibə isə Azərbaycanın mövqeyini beynəlxalq auditoriyaya çatdırmaq baxımından önəmli addım kimi qiymətləndirilir.

Fatimə Şükürova // EDnews