İyunun 9-da Fransanın Nitsa şəhərində rəsmi açılışı olan Birləşmiş Millətlər Təşkilatının Üçüncü Okean Konfransında Azərbaycan da iştirak edib. Konfrans, okeanların qorunması və dayanıqlı istifadəsi üzrə beynəlxalq ictimaiyyətin qlobal səylərini gücləndirməyə xidmət edir.

“EDnews” xəbər verir ki, Azərbaycanı tədbirdə ölkəmizin Fransadakı səfiri Leyla Abdullayeva təmsil edir.

Diplomat sosial media platforması X-də (əvvəlki “Twitter”) paylaşım edərək tədbirin əhəmiyyətinə toxunub:

“Fransa və Kosta-Rikanın birgə ev sahibliyi etdiyi 2025-ci ildə BMT-nin Okean Konfransında Azərbaycanı təmsil etməkdən şərəf duyuram.
Fəaliyyəti sürətləndirmək və okeanı qorumaq və davamlı şəkildə istifadə etmək üçün bütün aktyorları səfərbər etməyin vaxtıdır!”
Konfrans çərçivəsində iştirakçı dövlətlər arasında təcrübə mübadiləsi aparılır, iqlim dəyişikliyi, çirklənmə və biomüxtəlifliyin qorunması kimi mövzular müzakirə olunur.

Qeyd edək ki, Okean Konfransı BMT-nin Davamlı İnkişaf Məqsədləri çərçivəsində 14-cü məqsəd olan “Okeanların, dənizlərin və dəniz resurslarının qorunması”na nail olunmasına yönəlib.

Konfrans iyunun 13-dək davam edəcək.

Fatimə Şükürova // EDnews